პირველი კომპანია, რომელმაც მთვარეზე სრულად წარმატებული დაჯდომა შეასრულა, საჯარო ხდება

Firefly-ს ზოგიერთი პროგრამა საკმაოდ კარგად მიდის. სხვები — არც ისე.

Firefly Aerospace-ი საჯარო აქციების შეთავაზებით 600 მილიონ დოლარზე მეტის მოზიდვას ცდილობს, რაც კომპანიის საბაზრო კაპიტალიზაციას თითქმის 5.5 მილიარდ დოლარამდე გაზრდის. ამის შესახებ ორშაბათს, აშშ-ის ფასიანი ქაღალდებისა და ბირჟების კომისიაში (SEC) შეტანილ დოკუმენტშია ნათქვამი.

Firefly-ს პირველადი საჯარო შეთავაზების (IPO) დაწყება კომპანიის ისტორიულ წარმატებას ემთხვევა — მარტში, Firefly-ს Blue Ghost მოდულმა მთვარის ზედაპირზე წარმატებული დაჯდომა შეასრულა. Firefly გეგმავს, გაყიდოს 16.2 მილიონი ჩვეულებრივი აქცია, თითოეულის ფასით $35-დან $39-მდე. ამ პირობებით, Firefly-მ, შესაძლოა, საჯარო ბაზარზე 631.8 მილიონ დოლარამდე მოიზიდოს.

Firefly-მ განაცხადა, რომ მიღებულ თანხებს ვალის „არსებითი“ ნაწილის დასაფარად და „ზოგადი კორპორატიული მიზნებისთვის“ გამოიყენებს. Firefly-ს ზოგადი კორპორატიული მიზნები მრავალფეროვან საქმიანობას მოიცავს და ზოგიერთი მათგანი სხვებზე უკეთ მიდის.

არაერთგვაროვანი შედეგები

Blue Ghost-ი გახდა პირველი კერძო საკუთრებაში არსებული კოსმოსური ხომალდი, რომელმაc სხვა ციურ სხეულზე სრულად წარმატებული დაჯდომა შეასრულა და ამით NASA-სგან მიღებული 101.5 მილიონი დოლარის ღირებულების კონტრაქტი შეასრულა. Firefly-მ NASA-სგან Blue Ghost-ის პლატფორმის გამოყენებით კიდევ ორი მთვარის მისიის შეკვეთა მიიღო.

Firefly-ს Blue Ghost-ის დასაჯდომი მოდულის კამერით გადაღებული ფოტო, 2025 წლის 2 მარტი. კადრში, რომელიც მთვარეზე, ადგილობრივი მზის ამოსვლის შემდეგაა გადაღებული, მოდულის ჩრდილი და ჰორიზონტზე ამოჭრილი დედამიწა ჩანს. ფოტო: Firefly Aerospace

ამავდროულად, Firefly-ს უჭირს თავისი მცირე, Alpha რაკეტის საიმედოობის დამკვიდრება. 2021 წლიდან ექვსი გაშვებიდან, Alpha რაკეტამ დააფიქსირა ორი წარმატებული ფრენა, ორი ნაწილობრივი წარუმატებლობა, რომლებიც არასწორ ორბიტაზე დასრულდა და ორი მისია, რომლებმაc ორბიტას საერთოდ ვერ მიაღწიეს.

Firefly ასევე აქტიურად მუშაობს ახალი, საშუალო კლასის რაკეტა Eclipse-ის კაპიტალტევად განვითარებაზე Northrop Grumman-თან პარტნიორობით და ავითარებს კოსმოსური ხომალდების ხაზს, სახელად Elytra.

IPO-ები კვლავ მოდაშია

Firefly-ს განაცხადი საჯარო გახდომის შესახებ რამდენიმე წლის წინანდელ პერიოდს გვახსენებს, როდესაც მრავალი კოსმოსური კომპანია საჯარო ბაზარზე, ძირითადად, SPAC-ებთან შერწყმით გავიდა. მაგრამ SPAC-ბუმი კრახით დასრულდა.

ერთ-ერთი გამონაკლისია Rocket Lab, რომლის საბაზრო კაპიტალიზაცია დღეს თითქმის 23 მილიარდ დოლარს შეადგენს. Rocket Lab-მა, Firefly-ს მსგავსად, თავისი პროდუქტების დივერსიფიკაცია მოახდინა.

Firefly-ს ამჟამინდელი ძირითადი აქციონერი, AE Industrial Partners, IPO-ს შემდეგ კომპანიის დაახლოებით 42%-იან წილს შეინარჩუნებს.

გასულ თვეს, ფინანსური სერვისების ფირმა Charles Schwab-მა განაცხადა, რომ IPO-ები ბაზრის მრავალ სექტორში ბრუნდება. „ხანგრძლივი მშრალი პერიოდის შემდეგ, პირველადი საჯარო შეთავაზებების სივრცეში სიცოცხლის ნიშნებია,“ — განაცხადა Charles Schwab-მა ივნისში.

Firefly Aerospace-მა საქმიანობა მამოძრავებელი სისტემების კომპანიის სტატუსით დაიწყო. ამ ფოტოზე, რომელიც Firefly-მ მიმდინარე წლის დასაწყისში გაავრცელა, კომპანიის ძრავების ოჯახია წარმოდგენილი. მარცხნიდან მარჯვნივ: Miranda — Eclipse რაკეტისთვის; Lightning და Reaver — Alpha რაკეტისთვის; და Spectre — Blue Ghost და Elytra კოსმოსური ხომალდებისთვის.

Firefly-ს მიერ მარეგულირებელ დოკუმენტაციაში გამჟღავნებული ფინანსური ინფორმაცია აჩვენებს, რომ კომპანიამ 2024 წელს 60.8 მილიონი დოლარის შემოსავალი დააფიქსირა, რაც წინა წელთან შედარებით 10%-იანი ზრდაა. მაგრამ Firefly-ს წმინდა ზარალი 135 მილიონი დოლარიდან 231 მილიონ დოლარამდე გაიზარდა, ძირითადად, Eclipse რაკეტისა და Elytra ხომალდის კვლევასა და განვითარებაზე გაზრდილი დანახარჯების გამო.

ჩად ანდერსონმა, Space Capital-ის დამფუძნებელმა და მმართველმა პარტნიორმა, გასულ კვირას ინვესტორებს „რეალობის შემოწმებისკენ“ მოუწოდა.

„IPO-ების 90%, რომლებიც პირველ დღეს ორმაგდება, სამი წლის განმავლობაში უარყოფით უკუგებას იძლევა,“ — თქვა ანდერსონმა. „რამდენიმე გამორჩეული კომპანია გრძელვადიან პერსპექტივაში გამარჯვებული ხდება... მათ შორის, Rocket Lab-ი. მაგრამ ბევრი მოლოდინს ვერ ამართლებს... კოსმოსური ეკონომიკის მიმართ დიდი აღფრთოვანებაა და ეს სამართლიანია. ეს ინვესტორებისთვის თაობაში ერთხელ მოსული შესაძლებლობაა, მაგრამ, სამწუხაროდ, ვფიქრობ, ეს იქნება კიდევ ერთი მაგალითი იმისა, თუ რატომ არის საჭირო სპეციალიზებული ექსპერტიზა და ფინანსური ანგარიშგების წაკითხვისა და ბიზნესის ფუნდამენტების გაგების უნარი, რადგან სწორედ ეს გაიყვანს კომპანიებს გრძელვადიან პერსპექტივაში.“

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.