ხუთ ბავშვში აივ-ვირუსული დატვირთვა ანტირეტროვირუსული პრეპარატების მიღების შემდეგ გაქრა

აივ-ისგან განკურნების პირველი ფართომასშტაბიანი წარმატება, შესაძლოა, ბავშვებისგან მოვიდეს და არა ზრდასრულებისგან.

წლების განმავლობაში, ფილიპ გულდერი ერთი განსაკუთრებით მომხიბლავი იდეით იყო შეპყრობილი: აივ-ისგან განკურნების ძიებაში, ხომ არ შეიძლება, რომ პასუხები ბავშვებში იმალებოდეს?

2010-იანი წლების შუა პერიოდიდან, ოქსფორდის უნივერსიტეტის პედიატრმა და იმუნოლოგმა სამხრეთ აფრიკელ მეცნიერებთან დაიწყო მუშაობა, რათა თვალყური ედევნებინა რამდენიმე ასეული ბავშვისთვის, რომლებიც აივ-ით დედებისგან დაინფიცირდნენ.

მას შემდეგ, რაც ბავშვებს სიცოცხლის ადრეულ ეტაპზე ანტირეტროვირუსული პრეპარატები დაუნიშნეს, გულდერი და მისი კოლეგები მათ პროგრესს აკვირდებოდნენ. მაგრამ მომდევნო ათწლეულის განმავლობაში, რაღაც უჩვეულო მოხდა. ხუთმა ბავშვმა კლინიკაში წამლებისთვის სიარული შეწყვიტა და როდესაც გუნდმა, საბოლოოდ, მრავალი თვის შემდეგ, მათ მიაგნო, ისინი სრულიად ჯანმრთელები ჩანდნენ.

„იმის ნაცვლად, რომ მათი ვირუსული დატვირთვა კატასტროფულად მაღალი ყოფილიყო, ის შეუმჩნეველი იყო,“ — ამბობს გულდერი. „და ჩვეულებრივ, აივ-ი ორ-სამ კვირაში ბრუნდება.“

აივ-ისგან განკურნების ათწლეულების განმავლობაში მიმდინარე ძიებაში, ამან გამორჩეული იმედი გააჩინა: რომ აივ-ისგან განკურნების პირველი ფართომასშტაბიანი წარმატება, შესაძლოა, არა ზრდასრულებში, არამედ ბავშვებში მოხდეს.

განკურნების ახალი იმედი

ივლისის შუა რიცხვებში, კიგალიში, რუანდაში, გამართულ შიდსის საერთაშორისო საზოგადოების კონფერენციაზე, მადრიდის ინფანტა სოფიას საუნივერსიტეტო საავადმყოფოს პედიატრმა, ალფრედო ტაგარომ, წარმოადგინა ახალი კვლევა, რომელიც აჩვენებს, რომ აივ-ინფიცირებული ბავშვების დაახლოებით 5%, რომლებიც ანტირეტროვირუსულ პრეპარატებს სიცოცხლის პირველ ექვს თვეში იღებენ, საბოლოოდ, ახერხებენ აივ-ვირუსული რეზერვუარის — იმ უჯრედების რაოდენობის, რომლებიც ვირუსის გენეტიკურ მასალას შეიცავს — უმნიშვნელო დონემდე დათრგუნვას.

„ბავშვებს განსაკუთრებული იმუნოლოგიური მახასიათებლები აქვთ, რაც უფრო სავარაუდოს ხდის, რომ ჩვენ აივ-ისგან განკურნების საშუალებას მათთვის უფრო ადრე შევიმუშავებთ, ვიდრე სხვა პოპულაციებისთვის,“ — ამბობს ტაგარო.

მას შემდეგ, რაც 2007 წლიდან 10 ზრდასრული, სავარაუდოდ, განიკურნა, რომლებმაc სისხლის კიბოს სამკურნალოდ ღეროვანი უჯრედების ტრანსპლანტაცია მიიღეს, პედიატრებმა სულ უფრო ხშირად დაიწყეს იმის შემჩნევა, რომ ადრეული მკურნალობის შემდეგ, ბავშვების მცირე ნაწილი ახერხებს აივ-ის თვეების, წლების და, შესაძლოა, სამუდამოდაც დათრგუნვას მხოლოდ საკუთარი იმუნური სისტემით.

ახალი თერაპიები

ეს აღმოჩენები განსაკუთრებით იმედისმომცემია, რადგან აივ-მკვლევრები იწყებენ გაცილებით უფრო მძლავრი თერაპიული საშუალებების ინსტრუმენტების ნაკრებზე წვდომას.

• წამყვანია ე.წ. bNAb-ები, ანუ ფართოდ მანეიტრალიზებელი ანტისხეულები, რომლებსაც შეუძლიათ, ამოიცნონ და შეებრძოლონ აივ-ის ბევრ სხვადასხვა შტამს.

• ასევე მუშავდება მზარდი რაოდენობის თერაპიული ვაქცინები, რომლებსაც შეუძლიათ, იმუნური სისტემის T-უჯრედები გაწვრთნან აივ-რეზერვუარების სამიზნედ ამოსაღებად და გასანადგურებლად.

• ბავშვები ასევე განიხილებიან, როგორც იდეალური სამიზნე პოპულაცია კიდევ უფრო ამბიციური ექსპერიმენტული მკურნალობისთვის — ერთჯერადი გენური თერაპიისთვის, რომელიც სხეულის კუნთოვან უჯრედებს აწვდის ინსტრუქციებს, რათა მათ bNAb-ების უწყვეტი ნაკადი გამოიმუშაონ.

„ვფიქრობთ, რომ ამ ფართოდ მანეიტრალიზებელი ანტისხეულების ეფექტების ანტირეტროვირუსულ პრეპარატებზე დამატება დაგვეხმარება, ნაბიჯ-ნაბიჯ მივაღწიოთ იმას, რაც განკურნებისთვისაა საჭირო,“ — ამბობს გულდერი. „ეს ცოტათი ლეიკემიას ჰგავს, სადაც მკურნალობა სტაბილურად უმჯობესდებოდა და ახლა დაავადებული ბავშვების უმეტესობისთვის პროგნოზი წარმოუდგენლად კარგია.“

მიუხედავად იმისა, რომ ბავშვები აივ-ინფექციების საერთო რაოდენობის უმცირესობას შეადგენენ, მათი განკურნება, შესაძლოა, მოგვცეს დამატებითი ინფორმაცია, რომელიც დაგვეხმარება საერთო სამკურნალო თერაპიის უფრო ფართო მიზნის მიღწევაში.

„ჩვენ ბევრი რამის სწავლა შეგვიძლია მათგან, რადგან ისინი განსხვავებულები არიან,“ — ამბობს გულდერი. „ვფიქრობ, ჩვენ შეგვიძლია ვისწავლოთ, როგორ მივაღწიოთ განკურნებას ბავშვებში, თუ ამ გზას გავაგრძელებთ და იქიდან, ეს ზრდასრულებშიც იქნება გამოყენებადი.“

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.