ოფისში დაბრუნების პოლიტიკის გვერდის ავლა ისე, რომ დამსაქმებელმა ვერ შეამჩნიოს, უფრო რთულდება

კომპანიების უმეტესობა, რომლებიც საოფისე ფართს ამცირებენ, აცხადებენ, რომ ამის მიზეზი ჰიბრიდული მუშაობაა.

კომპანიები აკონტროლებენ, იცავენ თუ არა თანამშრომლები კორპორატიული ოფისში დაბრუნების (RTO) პოლიტიკას და მოთხოვნებს ბოლო ხუთ წელთან შედარებით უფრო მკაცრად აღასრულებენ. ამის შესახებ ნათქვამია კომერციული უძრავი ქონების ფირმა CBRE-ს ანგარიშში, რომელიც მომავალ კვირას გამოქვეყნდება და რომელსაც Ars Technica-მ წინასწარ გაეცნო.

CBRE-მ თავისი ანგარიშისთვის 184 კომპანია გამოკითხა. გამოკითხულ კომპანიებს შორის, 69% აკონტროლებს, მოდიან თუ არა თანამშრომლები ოფისში პოლიტიკით დადგენილი სიხშირით. ეს მაჩვენებელი გასულ წელს 45%-ს შეადგენდა.

გამოკითხული კომპანიების 73%-მა განაცხადა, რომ თანამშრომლები ოფისში დამსაქმებლის მიერ მოთხოვნილი სიხშირით მოდიან, რაც გასული წლის 61%-თან შედარებით ზრდაა.

ამასობაში, იმ კომპანიების წილი, რომლებმაc განაცხადეს, რომ ოფისში დასწრების პოლიტიკას უფრო მკაცრად აღასრულებენ, ორჯერ მეტად გაიზარდა — გასული წლის 17%-დან წელს 37%-მდე.

როგორ აკონტროლებენ კომპანიები თანამშრომლებს?

RTO პოლიტიკის აღსრულება კორპორატიული წესების დაცვის უზრუნველყოფის საშუალებაა. თუმცა, ზოგიერთმა გააკრიტიკა დამსაქმებლის ტექნიკა ოფისში დასწრების თვალყურის დევნებისთვის, როგორც თანამშრომლების „დაბავშვება“ და უსაფუძვლო უნდობლობის დემონსტრირება.

მაგალითად, გავრცელებული ინფორმაციით, Dell-ი თვალყურს ადევნებდა VPN-ის გამოყენებასა და ბეიჯების გამოყენებას, რამაც ზოგიერთი თანამშრომელი გააღიზიანა. Amazon, Google, JPMorgan Chase და Meta ასევე, სავარაუდოდ, თვალყურს ადევნებდნენ ბეიჯების გამოყენებას, TikTok-მა კი, გავრცელებული ინფორმაციით, დაიწყო აპლიკაცია ბეიჯების გამოყენების მონიტორინგისთვის და იმ თანამშრომლებთან დასაკავშირებლად, რომლებიც ოფისში მოსალოდნელ დროს არ მივიდნენ.

ალტერნატიული მიდგომა

თუმცა, სანამ ბევრი კომპანია თანამშრომლების ქცევის მონიტორინგს მიმართავს RTO წესების გამო, სხვები COVID-19-ის პანდემიით გამოწვეულ დისტანციური მუშაობის კულტურას თანამშრომლების მოსაზიდად და შესანარჩუნებლად იყენებენ.

მაგალითად, ლონდონში სათაო ოფისის მქონე ბანკი Standard Chartered-ი მენეჯერებსა და ინდივიდუალურ თანამშრომლებს საშუალებას აძლევს, გადაწყვიტონ, თუ რა სიხშირით არის მოსალოდნელი თანამშრომლების ოფისში ყოფნა. ივლისში, Standard-ის CEO-მ, ბილ უინტერსმა, Bloomberg Television-ს განუცხადა:

„ჩვენ ზრდასრულებთან ვმუშაობთ. ზრდასრულებს შეუძლიათ, სხვა ზრდასრულებთან ზრდასრული საუბარი გამართონ და გადაწყვიტონ, თუ როგორ საუკეთესოდ მართონ თავიანთი გუნდი.“

საოფისე ფართი

COVID-19-ის პანდემიის შემდეგ, არსებობდა ვარაუდი, რომ კომერციული უძრავი ქონების ბიზნესი სერიოზულად დაზარალდებოდა. CNBC-მ იტყობინება, რომ აშშ-ის საოფისე ვაკანსიის მაჩვენებელი (18.9%) ამჟამად 30 წლის განმავლობაში ნანახ უმაღლეს ნიშნულთან (19%) ახლოსაა.

თუმცა, CBRE-მ აღმოაჩინა, რომ მის მიერ გამოკითხული კომპანიებიდან, უფრო მეტი გეგმავს საოფისე ფართის გაფართოებას, ვიდრე შემცირებას. მაგრამ, სულ მცირე 10,000 თანამშრომლის მქონე კომპანიებს შორის, 60% შემცირებას გეგმავს. შემცირების დაგეგმილ კომპანიებს შორის, 79%-მა განაცხადა, რომ ამას იმიტომ აკეთებს, რომ მეტი ჰიბრიდული მუშაობა ნიშნავს, რომ მათ ნაკლები სივრცე სჭირდებათ.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.