ChatGPT-ს მომხმარებლები შოკირებულნი არიან, როდესაც აღმოაჩინეს, რომ მათი ჩატები Google-ის საძიებო შედეგებში გამოჩნდა

OpenAI ცდილობს, პირადი ChatGPT-საუბრები Google-ის შედეგებიდან სწრაფად წაშალოს.

მზარდი საზოგადოებრივი პროტესტის ფონზე, OpenAI-მ გააუქმა საკამათო ChatGPT-ფუნქცია, რომლის გამოც ზოგიერთმა მომხმარებელმა უნებლიედ დაუშვა თავისი პირადი — და უაღრესად მგრძნობიარე — ჩატების საძიებო შედეგებში გამოჩენა.

ოთხშაბათს, Fast Company-მ გამოაქვეყნა ინფორმაცია კონფიდენციალურობის ამ პრობლემის შესახებ და განაცხადა, რომ Google-ის საძიებო შედეგებში ათასობით ChatGPT-საუბარი იპოვეს. მიუხედავად იმისა, რომ ინდექსირება ChatGPT-ს მომხმარებლების შესახებ საიდენტიფიკაციო ინფორმაციას არ მოიცავდა, ზოგიერთი მათი ჩატი შეიცავდა ისეთ პირად დეტალებს — როგორიცაა მეგობრებთან და ოჯახის წევრებთან ურთიერთობის უაღრესად სპეციფიკური აღწერილობები — რამაც, შესაძლოა, მათი იდენტიფიცირება შესაძლებელი გახადოს.

OpenAI-ს ინფორმაციული უსაფრთხოების მთავარმა ოფიცერმა, დეინ სტაკიმ, X-ზე განმარტა, რომ ყველა მომხმარებელმა, ვისი ჩატებიც გასაჯაროვდა, თავად აირჩია ჩატების ინდექსირება, როდესაც ჩატის გაზიარებისას შესაბამისი ველი მონიშნა.

თუმცა, როგორც Fast Company-მ განმარტა, მომხმარებლები, შესაძლოა, შეცდომაში შეეყვანა ტექსტის ფორმატირებას:

„როდესაც მომხმარებლები აჭერდნენ ღილაკს „გაზიარება“, მათ ეძლეოდათ ვარიანტი, მოენიშნათ ველი წარწერით „გახადე ეს ჩატი აღმოჩენადი“. მის ქვემოთ კი, უფრო პატარა, ღია შრიფტით, ეწერა გაფრთხილება, რომ ჩატს შეეძლო, საძიებო სისტემების შედეგებში გამოჩენილიყო.“

თავდაპირველად, OpenAI იცავდა ამ ფორმულირებას, როგორც „საკმარისად ნათელს“, იტყობინებოდა Fast Company ხუთშაბათს. მაგრამ სტაკიმ დაადასტურა, რომ „საბოლოო ჯამში“, AI კომპანიამ გადაწყვიტა, რომ ფუნქცია „ქმნიდა ზედმეტად ბევრ შესაძლებლობას იმისთვის, რომ ხალხს შემთხვევით გაეზიარებინა ის, რისი გაზიარებაც არ სურდათ“. Fast Company-ს თანახმად, ეს მოიცავდა საუბრებს ნარკოტიკების მოხმარების, სექსუალური ცხოვრების, ფსიქიკური ჯანმრთელობისა და ტრავმული გამოცდილების შესახებ.

OpenAI Google-ის საძიებო შედეგების წაშლის პირობას დებს

სტაკიმ ამ ფუნქციას „ხანმოკლე ექსპერიმენტი“ უწოდა, რომელიც OpenAI-მ „ადამიანების დასახმარებლად, სასარგებლო საუბრები აღმოეჩინათ“, წამოიწყო. მან დაადასტურა, რომ ფუნქციის გაუქმების გადაწყვეტილება ასევე მოიცავდა მცდელობას, „წაეშალათ ინდექსირებული კონტენტი შესაბამისი საძიებო სისტემიდან“ დღეს, პარასკევს, დილამდე.

კარისა ველისმა, ოქსფორდის უნივერსიტეტის AI-ეთიკოსმა, Fast Company-ს განუცხადა, რომ ის „შოკირებული“ იყო იმით, რომ Google-ი „ამ უკიდურესად მგრძნობიარე საუბრებს“ ინახავდა. მისი თქმით, „ტექ-კომპანიები ზოგად მოსახლეობას, როგორც ზღვის გოჭებს, ისე იყენებენ... ისინი აკეთებენ რაღაცას, ცდიან მოსახლეობაზე და ელოდებიან, ვინმე თუ იჩივლებს“.

სკანდალი იმ ფონზე ხდება, როდესაც OpenAI-მ პირობა დადო, ებრძოლა სასამართლო ბრძანების წინააღმდეგ, რომელიც მას ავალდებულებს, ყველა წაშლილი ჩატი „განუსაზღვრელი ვადით“ შეინახოს. OpenAI-მ ეს ბრძოლა ჯერჯერობით წააგო და ეს ჩატები, სავარაუდოდ, მალე იმ სასამართლო პროცესში საძიებო გახდება.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.