Etsy 3D-ნაბეჭდი პროდუქტების წინააღმდეგ ზომებს ამკაცრებს — ახალი წესები ბევრ პროდუქტს კრძალავს

Etsy-მ თავისი „შემოქმედებითობის სტანდარტები“ განაახლა და მის ვებსაიტზე გაყიდული 3D-ნაბეჭდი პროდუქტების უდიდესი ნაწილი აკრძალა. ახლა, 3D-პრინტერით დაბეჭდილი ნებისმიერი ნივთი „გამყიდველის ორიგინალურ დიზაინზე დაყრდნობით უნდა იყოს წარმოებული“. როგორც ჩანს, ეს წაშლის უაღრესად პოპულარულ „მოქნილი დრაკონის“ ნაბეჭდებს — და ბევრ სხვა 3D-ნაბეჭდ ნივთს — რომლებიც Etsy-ს ვირტუალურ თაროებზე ათასობითაა წარმოდგენილი.

ეს ნაბიჯი 3D-ნაბეჭდი პროდუქტების გამყიდველებისთვის მოულოდნელი აღმოჩნდა, რადგან თავად Etsy-ს ამის შესახებ განცხადება არ გაუკეთებია. ამის ნაცვლად, განახლება მახვილთვალა Etsy-ს გამყიდველებმა შენიშნეს, რომლებმაc Etsy-ს საზოგადოების ბიულეტენში რამდენიმე გვერდის სიღრმეში ჩამალული იურიდიული სექცია, „ჩვენი სახლის წესები“, წაიკითხეს. 3D-ბეჭდვის ფორუმებზე განგაში ატყდა, რადგან Etsy-ს გამყიდველები პანიკაში ჩავარდნენ, რომ მათი მაღაზიები, შესაძლოა, დახურულიყო.

როდესაც Etsy პირველად, 20 წლის წინ, ამოქმედდა, ის ხელნაკეთი ნივთებისა და ვინტაჟური ტანსაცმლის ონლაინ-ბაზარი იყო. 2024 წელს კომპანიამ „შემოქმედებითობის სტანდარტების“ დანერგვა დაიწყო, რათა მყიდველები დაერწმუნებინა, რომ Etsy-ს ჯერ კიდევ ჰქონდა ადამიანური შეხება.

3D-ნაბეჭდი პროდუქტების გამყიდველები ვარაუდობდნენ, რომ ისინი „გამყიდველის მიერ დამზადებულის“ კატეგორიაში ჯდებოდნენ, რადგან ისინი ფიზიკურ პროდუქტებს ამზადებენ. „შემოქმედებითობის სტანდარტების“ თავდაპირველ ვერსიაში, რომელიც Wayback Machine-ის 2025 წლის 29 მაისის სკრინშოტში ჩანს, ნათქვამია, რომ „გამყიდველის მიერ დამზადებული“ ნივთები შეიძლება, დამზადდეს კომპიუტერიზებული ინსტრუმენტებით დიზაინის ან შაბლონის მიხედვით.

ეს ხაზი ახლა შეცვლილია და ასე იკითხება:

„კომპიუტერიზებული ინსტრუმენტების გამოყენებით წარმოებული ნივთები: ფიზიკური ნივთები, რომლებიც გამყიდველმა თავის პირად მაღაზიაში ან სახლში აწარმოა, ისეთი კომპიუტერიზებული ინსტრუმენტების გამოყენებით, როგორიცაა ლაზერული პრინტერი, 3D-პრინტერი, CNC ან Cricut-ის მანქანა. ეს ნივთები უნდა იყოს წარმოებული გამყიდველის ორიგინალურ დიზაინზე დაყრდნობით და ხშირად პერსონალიზებული ან მყიდველის სპეციფიკაციების მიხედვით მორგებულია.“

ეს გამორიცხავს ათასობით „მეიკერს“, რომლებიც გამოწერილი აქვთ ისეთი დიზაინერები, როგორიცაა Cinderwing3D და აქვთ ნებართვა, დაბეჭდონ და გაყიდონ მისი სახსრიანი დრაკონის დიზაინები.

გაურკვევლობა და რჩევები

Etsy-ს არ უთქვამს, თუ როგორ გეგმავს ახალი პოლიტიკის აღსრულებას. დიზაინერები თავიანთ მხარდამჭერებს მოუწოდებენ, შეინარჩუნონ სიმშვიდე და დაელოდონ განმარტებას. მანამდე კი, გამყიდველებს, შესაძლოა, შეეძლოთ, თავიანთი მაღაზიები ღია დატოვონ, თუ ცოტა მეტ ძალისხმევას ჩადებენ თავიანთ განცხადებებსა და ფოტოებში, რათა მათ უნიკალური პიროვნულობა ჰქონდეთ.

3D-ბეჭდვა, როგორც ასეთი, Etsy-ზე საფრთხის ქვეშ არ არის, რადგან საკუთარი ქმნილებების დაბეჭდვა და გაყიდვა კვლავ წახალისებულია. ხოლო ადამიანებს, რომლებსაც მესამე მხარის დიზაინების მარაგი აქვთ, კვლავ შეუძლიათ ნივთების გაყიდვა სხვა პლატფორმებზე, როგორიცაა Facebook Marketplace, eBay ან TikTok.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.