Google-ი და Valve-ი „Steam for Chromebooks“ ექსპერიმენტს 2026 წლის იანვარში შეწყვეტენ

ბეტა-ვერსიიდან გამოსვლის ერთ-ერთი გზა.

ცუდი ამბავი იმ მცირერიცხოვანი ადამიანებისთვის, ვინც Steam-ს Chromebook-ზე თამაშების სათამაშოდ იყენებს: Google-ი და Valve-ი ემზადებიან, შეწყვიტონ Steam-ის ჯერ კიდევ ბეტა-ვერსიაში მყოფი ChromeOS-ვერსიის მხარდაჭერა 2026 წლის 1 იანვრიდან, იტყობინება 9to5Google. Steam-ის დაყენება Chromebook-ებზე კვლავ შესაძლებელია, მაგრამ ახლა მას თან ახლავს შეტყობინება მხარდაჭერის დასრულების შესახებ.

„Steam for Chromebook-ის ბეტა-პროგრამა 2026 წლის 1 იანვარს დასრულდება,“ — ნათქვამია შეტყობინებაში. „ამ თარიღის შემდეგ, ბეტა-პროგრამის ფარგლებში დაყენებული თამაშების თქვენს მოწყობილობაზე თამაში შეუძლებელი იქნება.“

Steam-ი Chromebook-ებზე თავდაპირველად 2022 წლის დასაწყისში გამოვიდა, როგორც ალფა-ვერსია, რომელიც მხოლოდ რამდენიმე ახალ და მაღალი კლასის მოწყობილობაზე მუშაობდა. ბეტა-ვერსია იმავე წლის ბოლოს გამოჩნდა, შემცირებული სისტემური მოთხოვნებითა და AMD-ს პროცესორებისა და GPU-ების მხარდაჭერით.

Steam-ის ბეტა იყო „გეიმინგ-Chromebook“-ების კამპანიის ერთ-ერთი კომპონენტი, რომელიც Google-მა 2022 და 2023 წლებში წამოიწყო.

წარუმატებლობის მიზეზები

Chromebook-ებზე Steam-ის ბეტა-ვერსია თამაშების შეზღუდული თავსებადობით გამოირჩეოდა, მიუხედავად იმისა, რომ Proton-ის თამაშების თავსებადობის ფენას იყენებდა, რომელიც ბევრ Windows-თამაშს Valve-ის Linux-ზე დაფუძნებულ SteamOS-ზე უშვებს. ეს, ნაწილობრივ, იმ ნელი, ძველი, დაბალი კლასის ჩიპების გამო იყო, რომლებიც Chromebook-ების უმეტესობაშია მოთავსებული.

Google-ს თავის სიაში სულ 99 თამაში აქვს, რომლებიც კარგად მუშაობს — ძირითადად, ძველი ან/და ნაკლებად მომთხოვნი თამაშები, მათ შორის, ბევრი 2D-გრაფიკით.

Google-ი ერთ დროს Nvidia GeForce-ის GPU-ებით აღჭურვილ Chromebook-ებს ტესტავდა, მაგრამ ეს პროექტები ჩუმად და უცერემონიოდ გაუქმდა, სანამ რაიმე შედეგს გამოიღებდა.

შესაძლოა, Steam-ის პროექტი დაბალი გამოყენების გამო იხურება, ან იმიტომ, რომ Chromebook-ებს თამაშების სათამაშოდ საჭირო აპარატურა არ გააჩნია. მაგრამ Google-ს ასევე შეეძლო, ეცადა, მოეწესრიგებინა ChromeOS-თან დაკავშირებული პროექტები, როგორც მისი (საჯაროდ გაცხადებული, მაგრამ უკიდურესად ბუნდოვანი) გეგმების ნაწილი Android-ისა და ChromeOS-ის შერწყმის შესახებ. ნებისმიერ შემთხვევაში, როგორც ჩანს, Chromebook-ებზე გეიმინგი უახლოეს მომავალში, ძირითადად, ღრუბლოვანი დარჩება.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.