Google-მა Gemini 2.5 Deep Think-ი AI Ultra-ს გამომწერებისთვის გამოუშვა

ეს ულტრა-მძლავრი AI ულტრა-ძვირია.

Google-ი დღეიდან თავის ყველაზე მძლავრ Gemini მოდელს უშვებს, მაგრამ, სავარაუდოდ, მის გამოცდას ვერ შეძლებთ. მას შემდეგ, რაც Gemini 2.5 Deep Think-ი მაისში გამართულ I/O კონფერენციაზე წარადგინეს, Google-ი ამ AI-ს Gemini-ს აპლიკაციაში ხელმისაწვდომს ხდის. Deep Think-ი ყველაზე რთული მოთხოვნებისთვისაა შექმნილი, რაც ნიშნავს, რომ ის სხვა მოდელებზე მეტ გამოთვლით რესურსს იყენებს. ამიტომ, გასაკვირი არ არის, რომ მასზე წვდომა მხოლოდ მათ ექნებათ, ვინც Google-ის $250-იან AI Ultra გეგმას გამოიწერს.

Deep Think-ი იმავე საფუძველზეა აგებული, რაზეც Gemini 2.5 Pro, მაგრამ ის ზრდის „ფიქრის დროს“ უფრო დიდი პარალელური ანალიზის მეშვეობით. Google-ის თანახმად, Deep Think-ი პრობლემის გადაჭრის მრავალ მიდგომას იკვლევს, მათ შორის, ხელახლა განიხილავს და აერთიანებს მის მიერვე გენერირებულ სხვადასხვა ჰიპოთეზას. ეს პროცესი მას უფრო მაღალი ხარისხის შედეგის შექმნაში ეხმარება.

ზოგიერთი სხვა მძლავრი Gemini-ინსტრუმენტის მსგავსად, Deep Think-ს პასუხის მოსამზადებლად რამდენიმე წუთი სჭირდება. როგორც ჩანს, ეს AI-ს უფრო დახვეწილს ხდის დიზაინის ესთეტიკაში, სამეცნიერო მსჯელობასა და კოდირებაში.

შედეგები ბენჩმარკებში

Google-მა Deep Think-ი ბენჩმარკების სტანდარტულ ნაკრებში გამოსცადა, რომელმაc აჩვენა, რომ ის აჭარბებს სტანდარტულ Gemini 2.5 Pro-სა და კონკურენტ მოდელებს, როგორიცაა OpenAI o3 და Grok 4. Deep Think-მა განსაკუთრებით დიდი უპირატესობა აჩვენა Humanity's Last Exam-ში — 2,500 რთული, მულტიმოდალური კითხვის კრებულში, რომელიც 100-ზე მეტ საგანს მოიცავს. სხვა მოდელების მაქსიმალური შედეგი 20-25%-ია, Gemini 2.5 Deep Think-მა კი 34.8%-იანი ქულა დააგროვა.

Deep Think-ის დიდი ფოკუსი მათემატიკაა, სადაც მან ასევე ძლიერი შედეგი აჩვენა AIME-ს ბენჩმარკში. Google-მა ცოტა ხნის წინ განაცხადა, რომ მან გამოიყენა Deep Think-ის სპეციალურად გაწვრთნილი ვერსია, რომელსაც ამოხსნის მოსამზადებლად საათობით მუშაობა შეუძლია, საერთაშორისო მათემატიკურ ოლიმპიადაში (IMO) მონაწილეობის მისაღებად. ამ მოდელმა პირველად მოიპოვა IMO-ს ოქროს მედალი. Google-მა Deep Think-ის IMO ვერსია მხოლოდ სანდო ტესტერებს მიაწოდა, მაგრამ იმედოვნებს, რომ მოგვიანებით მას უფრო ფართოდ გამოუშვებს. ამასობაში, სტანდარტული Deep Think-ი 2025 წლის IMO-ს ტესტში ბრინჯაოს მედლის სტატუსს აღწევს.

Google AI Ultra-ს გამომწერებს Deep Think-ზე წვდომა დღეიდან შეეძლებათ Gemini-ს აპლიკაციასა და ვებ-ინტერფეისში. ის ხელმისაწვდომია, როგორც ინსტრუმენტი (Deep Research-თან, Canvas-თან და სხვებთან ერთად), როდესაც Gemini 2.5 Pro-ს ირჩევთ. Google-ის თქმით, Deep Think-ის მოთხოვნების რაოდენობა დღეში შეზღუდულია.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.