SignalRGB-მა Razer-ს დასცინა და სრულფასოვანი RGB-ტოსტერი-კომპიუტერი შექმნა

ის ნამდვილ ტოსტებს ვერ ამზადებს, მაგრამ ნამდვილ თამაშებს უშვებს.

იმის ნაცვლად, რომ დალოდებოდნენ Razer-ის დიდი ხნის დაპირებულ, პურის მხუხავ მოწყობილობას, RGB-პროგრამული უზრუნველყოფის ექსპერტებმა SignalRGB-ში შექმნეს ტოსტერი-კომპიუტერი, რომელიც, როგორც ჩანს, რეალური და სრულად ფუნქციონალურია (ყოველ შემთხვევაში, კომპიუტერული თვალსაზრისით). და იმით, რაც, შესაძლოა, ვირუსული მარკეტინგის შედევრი აღმოჩნდეს, კომპანია ამ სისტემას ათამაშებს.

კომპიუტერი, პირდაპირი გაგებით, დესკტოპ-კომპიუტერია, რომელიც ჩვეულებრივ, ვერცხლისფერ, ოთხსლოტიან ტოსტერის შასიშია ჩატენილი. ცხადია, ის ტოსტებს არ ამზადებს, რაზეც RGB-ვენტილატორიც მიუთითებს, რომელიც პურის ორ სლოტს ბლოკავს. წინა პანელი მოდიფიცირებულია და სრულფასოვან Stream Deck-ს მოიცავს, გვერდებზე კი პერფორაციებია გაკეთებული, რათა შიდა ვენტილატორებმა კომპონენტების გარშემო ჰაერის ცირკულაცია უზრუნველყონ. SignalRGB-მა ასევე გადაამუშავა ამომგდები სახელურები სისტემის ჩართვისა და გადატვირთვის ფუნქციონირებისთვის.

SignalRGB-ის ტოსტერი-კომპიუტერი, როგორც მოსალოდნელი იყო, RGB-განათებითაა გაჟღენთილი.

შიდა კომპონენტები

ტოსტერის შიგთავსი ამოღებულია, რათა მასში Mini-ITX კომპიუტერი მოთავსდეს, რომელიც მოიცავს Core i5-14600K პროცესორს, Zotac RTX 5060 გრაფიკულ ბარათს, Z790-I Mini-ITX დედაპლატას, 32GB G.Skill Trident Z DDR5 მეხსიერებას, Cooler Master 850W SFX კვების ბლოკსა და 1TB WD Black NVMe SSD-ს.

ეს სისტემა აშკარად SignalRGB-ის Razer-ის მისამართით გაკეთებული ქილიკია, იმის გამო, რომ მან „Project Breadwinner“ დროულად არ დაასრულა: „ეს რაღაც ნახევრად გამომცხვარი იდეა არ არის — ჩვენ ნამდვილი ტოსტერი გამოვშიგნეთ და შიგნით ლეგიტიმური სათამაშო სისტემა ჩავტენეთ.“

„Project Breadwinner“ იყო Razer-ის მიერ წამოწყებული პროექტი, რომელიც გეიმერებისთვის RGB-განათებიანი ტოსტერის შექმნას ისახავდა მიზნად. იდეა 2013 წელს, როგორც Facebook-ხუმრობა, დაიწყო, სანამ Razer-მა ის 2016 წელს საპირველაპრილო ხუმრობად აქცია. მაგრამ ყველაფერი გართულდა, როდესაც Razer-ის CEO თავის Facebook-საზოგადოებას დაჰპირდა, რომ თუ გვერდი საკმარის ლაიქს დააგროვებდა და ხალხი საკმარის ტატუს გაიკეთებდა (დიახ, ტატუს), ის ტოსტერს ნამდვილად შექმნიდა.

პროექტმა კულტის მსგავსი მიმდევრები შეიძინა და სულ მცირე 12-მა ადამიანმა სხეულზე Razer-ის ტოსტერის ნამდვილი ტატუ გაიკეთა. Razer-ის პროექტს 2019 წლის შემდეგ განახლება არ ჰქონია.

ცხადია, SignalRGB-ის ტოსტერი ტოსტებს არ ამზადებს, როგორც „Project Breadwinner“ გვპირდებოდა, მაგრამ ის რეალობაა, ზუსტად ტოსტერს ჰგავს და ვიდეოთამაშებს უშვებს.

პირადად ჩვენ, ვისურვებდით, რომ SignalRGB-მ კიდევ 11 ასეთი სისტემა დაამზადოს და იმ მამაც ათეულს გადასცეს, რომლებმაc Razer-ის ტოსტერის ტატუები გაიკეთეს. ისინი თავიანთი სხეულის თამამი მოდიფიკაციისთვის რაღაც ხელშესახებს იმსახურებენ.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.