გამოსასყიდი პროგრამებით ჩადენილი დანაშაულებისთვის პროფესიონალი კალათბურთელი და 4 ახალგაზრდა დააკავეს

ეჭვმიტანილები, სავარაუდოდ, გამოსასყიდი პროგრამებით განხორციელებული შეტევების სერიაში იყვნენ ჩართულნი. 

ევროპის სამართალდამცავმა უწყებებმა ხუთი ადამიანი დააკავეს, მათ შორის ყოფილი რუსი პროფესიონალი კალათბურთელი, კრიმინალურ სინდიკატებთან კავშირის ბრალდებით, რომლებიც გამოსასყიდი პროგრამებით (ransomware) განხორციელებულ თავდასხმებზე იყვნენ პასუხისმგებელნი. ერთ-ერთი ეჭვმიტანილი, Daniil Kasatkin-ი, ცოტა ხნის წინ თამაშობდა კალათბურთის გუნდ MBA Moscow-ში, რომელიც VTB გაერთიანებული ლიგის ნაწილია. Kasatkin-ი ასევე მცირე ხნით თამაშობდა Penn State University-ის გუნდში 2018–2019 წლების სეზონში. ის ბრალდებებს უარყოფს. გასულ ოთხშაბათს, AFP-მ და Le Monde-მ გაავრცელეს ინფორმაცია, რომ Kasatkin-ი 21 ივნისს საფრანგეთში, აშშ-ის ხელისუფლების მოთხოვნით დააკავეს. დაკავება დე გოლის აეროპორტში მოხდა, როდესაც კალათბურთელი თავის საცოლესთან ერთად მოგზაურობდა. 26 წლის სპორტსმენი 23 ივნისიდან ექსტრადიციის მიზნით პატიმრობაში იმყოფება. 

აშშ-ის პროკურორები Kasatkin-ს ადანაშაულებენ იმაში, რომ ის გამოსასყიდის გადახდაზე აწარმოებდა მოლაპარაკებებს იმ ორგანიზაციებთან, რომლებიც უსახელო გამოსასყიდი პროგრამების სინდიკატის მიერ იყო გატეხილი. ეს სინდიკატი 900 სხვადასხვა შეტევაზეა პასუხისმგებელი. აშშ-ის დაკავების ორდერში ნათქვამია, რომ ის იძებნება „კომპიუტერული თაღლითობის ჩადენის შეთქმულებისა“ და „კომპიუტერული თაღლითობისთვის“. 

Kasatkin-ის ადვოკატის თქმით, მისი კლიენტი ყველა ბრალდებაში უდანაშაულოა. 

„მან მეორადი კომპიუტერი იყიდა“, — განუცხადა ადვოკატმა ჟურნალისტებს. „მას აბსოლუტურად არაფერი ჩაუდენია. ის გაოგნებულია. კომპიუტერებში ვერ ერკვევა და აპლიკაციის დაყენებაც კი არ შეუძლია. კომპიუტერზე არაფერს შეხებია. ის ან გატეხილი იყო, ან ჰაკერმა მიჰყიდა მას, რათა სხვისი სახელით ემოქმედა.“ აშშ-ის ხელისუფლება ამჟამად Kasatkin-ის ექსტრადირების პროცესშია. 

ერთმანეთთან დაუკავშირებელი გამოსასყიდი თავდასხმები 

ამასობაში, გაერთიანებული სამეფოს ხელისუფლებამ ოთხი პირი დააკავა ცალკეულ და ერთმანეთთან დაუკავშირებელ გამოსასყიდი პროგრამებით ოპერაციებთან დაკავშირებით. გაერთიანებული სამეფოს ეროვნული დანაშაულის სააგენტოს (NCA) განცხადებით, სამი მამაკაცი და ერთი ქალი დააკავეს გამოძიების ფარგლებში, რომელიც M&S-ის, Co-op-ისა და Harrods-ის წინააღმდეგ განხორციელებულ ბოლოდროინდელ თავდასხმებს ეხებოდა. თავდასხმები მიეწერა Scattered Spider-ს, ჰაკერების კოლექტივს, რომელიც იმიტაციისა და ფიშინგის ტაქტიკებს იყენებს, რათა ქოლ-ცენტრები და კომპანიის დახმარების სამსახურები მოატყუოს და მათ ქსელებზე წვდომა მოიპოვოს. Scattered Spider-თან დაკავშირებულ სხვადასხვა პირს ასევე ბრალი ედება 2023 წლის თავდასხმებში, რომლებმაც MGM Resorts-ისა და Caesars Entertainment-ის ოპერაციები შეაჩერეს. 

ეჭვმიტანილების — ორი 19 წლის მამაკაცის, 17 წლის არასრულწლოვანისა და 20 წლის ქალის — ვინაობა არ სახელდება. გასულ ხუთშაბათს, KrebsOnSecurity-ის მიერ გამოქვეყნებულ პოსტში ორი 19 წლის ეჭვმიტანილის იდენტიფიცირება მოხდა. გამოცემის თანახმად, ერთ-ერთი მათგანი ასევე მონაწილეობდა MGM-ზე თავდასხმაში, მეორე კი LAPSUS$-ის — მოზარდების მოუწესრიგებელი ჯგუფის — „ძირითადი წევრი“ იყო. LAPSUS$ პასუხისმგებელია თავდასხმების სერიაზე, რომლის შედეგადაც გატეხეს Microsoft-ის, Okta-ს, Nvidia-ს, Globant-ის, Rockstar Games-ის, Samsung-ის, T-Mobile-ისა და Uber-ის ქსელები. 

უცნობია, აღიარეს თუ არა რომელიმე ეჭვმიტანილმა დანაშაული. 

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ უფლება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.