კორპორატიულმა უპასუხისმგებლობამ ჩემი საყვარელი გაჯეტი გამოუსადეგარი გახადა

იშვიათი, პროპრიეტარული ტექნოლოგიის გარეშე, ეს ყურსასმენები უსარგებლოა. 

ამ დილით სარბენად წავედი, ხელში iPhone-ი მეჭირა, რომელიც კაბელით ჩემს ყურსასმენებს უერთდებოდა. წლებია, სადენიანი ყურსასმენებით ვვარჯიშობ, მაგრამ დღეს, კაბელი, თავისი მუდმივი ხანხალით, განსაკუთრებით მაფორიაქებდა. ეს იმიტომ, რომ აქამდე Bluetooth ყურსასმენებით, EPOS-ის GTW 270-ით დავრბოდი. ისინი 2021 წელს გამოვიდა 200 დოლარად და მე ისინი მაჩუქეს. ძირითადად, უჯრაში იდო ამ გაზაფხულამდე, სანამ რამდენიმეწლიანი პაუზის შემდეგ გარეთ სირბილი დავიწყე. ტელეფონის შესანახი ადგილის გარეშე, სადენიანი ყურსასმენები სირბილისას მოუხერხებელი აღმოჩნდა. მანამდე GTW 270-ს ყურადღებას არ ვაქცევდი, რადგან ისინი არ არის ისეთი კომფორტული, როგორც ჩემი სადენიანი ყურსასმენები და კავშირს კარგავს (განსაკუთრებით ჩემს კომპიუტერთან), თუ აუდიო მომენტალურად შეწყდება. თუმცა, ეს უკანასკნელი პრობლემა ტელეფონთან გამოყენებისას ნაკლებად გავრცელებული აღმოჩნდა. მოულოდნელად, მე მოვიხიბლე გაჯეტით, რომელმაც თავისი ცხოვრების უმეტესი ნაწილი უჯრაში დავიწყებულმა გაატარა. 

მაგრამ რამდენიმე ხანმოკლე თვის შემდეგ, უსადენო ყურსასმენების შესახებ ჩემი ერთ-ერთი ყველაზე ადრეული შიში გამართლდა: დავკარგე GTW 270-ის ქეისი, რომელიც ყურსასმენებს ტენის და დაწყვილების საშუალებას იძლევა. ცუდი ამბავი კიდევ უფრო გაუარესდა, როდესაც გავაცნობიერე, რომ EPOS-ი ცალკე გასაყიდ დამტენ ქეისებს არ ყიდის. EPOS-ი ადრე ყიდდა მათ, მაგრამ შეწყვიტა მას შემდეგ, რაც კომპანია სამომხმარებლო ტექნოლოგიების ბაზრიდან გავიდა, მასზე შემოსვლიდან სულ რაღაც სამი წლის შემდეგ. 

 ხანმოკლე ბიზნეს წამოწყება 

დანიურმა ჯანდაცვის აუდიო ტექნოლოგიების კომპანია Demant-მა EPOS ბრენდი 2020 წელს, გერმანულ აუდიო ფირმა Sennheiser-თან ერთობლივი საწარმოს დახურვის შემდეგ შექმნა. 2023 წლის აგვისტოსთვის კი Demant-მა უკვე გამოაცხადა, რომ თავის სათამაშო ბიზნესს „ეტაპობრივად“ ხურავდა, „პროცესი კი 2024 წლის განმავლობაში უნდა დასრულებულიყო“. განცხადებაში, Demant-ის პრეზიდენტმა და დირექტორმა, Søren Nielsen-მა, განმარტა: „ჩვენი სათამაშო ბიზნესი არასტაბილური საბაზრო გარემოს წინაშე აღმოჩნდა. 2020 წელს პანდემიით გამოწვეული უჩვეულო მოთხოვნის შემდეგ, სათამაშო ბაზარი მნიშვნელოვნად შენელდა მომხმარებელთა სუსტი განწყობის გამო და ჩვენ ვერ ვხედავთ მომგებიანი ბიზნესის შექმნის სიცოცხლისუნარიან გზას პროდუქტებში, ბრენდსა და დისტრიბუციაში მნიშვნელოვანი ინვესტიციების გარეშე.“ EPOS-ი დაჰპირდა, რომ „მოემსახურებოდა და მხარს დაუჭერდა მომხმარებლებს, სანამ არსებული პროდუქტების მარაგი შემცირდებოდა“. ორი წლის შემდეგ, მხარდაჭერა და მარაგი ილევა. 

უფრო ხელმისაწვდომი ქეისების საჭიროება 

EPOS-ი ნამდვილად ყიდდა GTW 270-ის შემცვლელ დამტენ ქეისებს თავის ამერიკულ ონლაინ მაღაზიაში. თუმცა, ეს URL აღარ იტვირთება და თუ შემცვლელი ქეისის ყიდვა მინდა, საუკეთესო ვარიანტი, რომელსაც ახლა ვხედავ, არის eBay, რომელსაც ტექნიკური თაღლითობის თავისი წილი აქვს. გულწრფელად რომ ვთქვა, დამტენი ქეისის დაკარგვა მთლიანად ჩემი ბრალია. მაგრამ, თუ EPOS-ის მსგავს გაჯეტების მწარმოებლებს შეეძლოთ, უფრო მომხმარებელზე-ცენტრირებული მიდგომა ჰქონოდათ იმის შესახებ, თუ როგორ უნდა გაყიდონ ახალი და ძველი პროდუქტები, მე არ მექნებოდა ყურსასმენები, რომლებსაც ვერ ვიყენებ. 

EPOS-ი არ არის ერთადერთი კომპანია, რომელმაც ოდესმე გაართულა უსადენო ყურსასმენების ნაწილების შეცვლა. მაგალითად, თქვენ შეგიძლიათ მარტივად იყიდოთ უახლესი AirPods-ები Apple-ის ონლაინ მაღაზიიდან, მაგრამ არა შემცვლელი ყურსასმენები ან ქეისები; ამისთვის Apple გირჩევთ, ეწვიოთ Apple-ის ავტორიზებულ სერვის პროვაიდერს. მეორე მხრივ, ზოგიერთ ახალ AirPod-სა და AirPod Pro-ს ქეისს აქვს დინამიკები Apple-ის Find My აპლიკაციის გამოსაყენებლად, თუ ქეისს დაკარგავთ. 

კარგი იქნებოდა, ჩემი ყურსასმენები როგორმე მაინც იტენებოდეს და დაწყვილება პროპრიეტარული ქეისის გარეშეც შეეძლოს. ამას, შესაძლოა, უფრო მოცულობითი ყურსასმენები ან/და დამატებითი კომპონენტები დასჭირდეს, მაგრამ ეს საშუალებას მომცემდა, ჩემი სხვა მხრივ გამართული ყურსასმენები გამომეყენებინა. 

Amber Case, Calm Tech Institute-ის დამფუძნებელი, ჩემისთანა პრობლემების პოტენციურ გადაწყვეტად უნივერსალურ დამტენ ქეისებს გვთავაზობს. მან პროპრიეტარული ქეისები იმას შეადარა, თითქოს თქვენი მანქანისთვის თავსებადი საწვავის საპოვნელად სპეციალურ ბენზინგასამართ სადგურზე გიწევდეთ სიარული. მისი თქმით: „...ბევრმა კომპანიამ რამდენიმე ბიზნეს შეცდომა დაუშვა და შეუძლებლად მიიჩნია, ერთდროულად დაეკმაყოფილებინათ როგორც კვარტალური ზრდა, ისე მომხმარებლის ლოიალობა. თქვენი სრულიად ფუნქციური ყურსასმენების ელექტრონულ ნარჩენებად ქცევა ერთი დაკარგული კომპონენტის გამო აჩვენებს, თუ როგორ უწევს ბევრ კომპანიას, ფეხი აუწყოს ბაზარს, ვერ იყურებოდეს შორს და უჭირდეს წარმოების შენარჩუნება კონკრეტული თარიღების შემდეგ.“ Case-მა მიუთითა ისეთ კომპანიებზე, როგორიცაა Bosch, რომლებიც, პირიქით, მთელი სიცოცხლის განმავლობაში მომხმარებლის მხარდაჭერას კონკურენტულ უპირატესობად და უკეთესი მოგების მიღების გზად იყენებენ. 

ისევ უჯრაში 

მე ვკითხე EPOS-ს მისი სათამაშო ბიზნესის სამი წლის შემდეგ დახურვის გარემოსდაცვითი შედეგების შესახებ. კომპანიის წარმომადგენელმა თქვა: „ჩვენი სათამაშო ბიზნესიდან გასვლის პროცესში, ჩვენ ვიმუშავეთ, რათა უზრუნველგვეყო პასუხისმგებლიანი დახურვა და არსებული მომხმარებლებისთვის მხარდაჭერის შენარჩუნება. ჩვენ ყოველთვის ვცდილობთ, მინიმუმამდე დავიყვანოთ ნარჩენები და მაქსიმალურად გავზარდოთ გამოყენებადობა, სადაც ეს შესაძლებელია ტექნიკური და ლოგისტიკური შესაძლებლობების ფარგლებში.“ ეს მცირე ნუგეშია ყურსასმენებისთვის, რომლებიც, სავარაუდოდ, თავიანთ მარტოსულ უჯრას დაუბრუნდებიან, სანამ მე ჩემს შეზღუდულ ვარიანტებს განვიხილავ. რადგან კომპანიას არ შეუძლია ღირსეული პროდუქტის საკმარისი დროით მხარდაჭერა, მე იძულებული ვარ, სირბილისას მუსიკისთვის მოხანხალე კაბელს დავეყრდნო. 

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ უფლება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.