Samsung-ი და Epic Games-ი მრავალწლიან დავას შეთანხმებით ასრულებენ
Epic Games-მა და Samsung-მა აპლიკაციების მაღაზიასთან დაკავშირებული მრავალწლიანი დავა შეთანხმებით დაასრულეს. მორიგება, რომელიც Samsung-ის „Auto Blocker“ ფუნქციას ეხებოდა, ახალი Galaxy სმარტფონების წარდგენამდე შედგა.
Epic-ის დირექტორი ტიმ სუინი ამბობს, რომ Samsung-ი ცვლილებებს განახორციელებს, თუმცა დეტალები ჯერ უცნობია.
Epic Games-მა, რომელიც Fortnite-ის უზარმაზარი წარმატებითაა გამხნევებული, ბოლო რამდენიმე წელი მობილურ ინდუსტრიაში აქტიურად იბრძოდა, რათა საკუთარი აპლიკაციების მაღაზია მეტ ტელეფონზე განეთავსებინა. 2023 წლის ბოლოს კომპანიამ ანტიმონოპოლიური დავა მოუგო Google-ს, მომდევნო წელს კი Samsung-ს უჩივლა Android ტელეფონებზე „Auto Blocker“ ფუნქციის დანერგვისთვის, რომელიც მომხმარებლებს Epic Games Store-ის დაყენებას ურთულებდა. ახლა კი, მხარეებმა საქმე მორიგებით დაასრულეს, სულ რამდენიმე დღით ადრე, სანამ Samsung-ი თავის უახლეს სმარტფონებს წარადგენდა.
Epic Store-ის დრამა რამდენიმე წლის წინ დაიწყო, როდესაც კომპანიამ Google-ისა და Apple-ის წესები დაარღვია და მეგაპოპულარულ Fortnite-ში გარე გადახდების სისტემა დანერგა. ორივე მაღაზიამ აპლიკაცია წაშალა, რაზეც Epic-მა სასამართლოში იჩივლა. Apple-მა დავა მოიგო და Fortnite-ი iPhone-ზე მხოლოდ ახლახან დაბრუნდა. Google-მა კი საქმე წააგო, რადგან Epic-მა დაამტკიცა, რომ კომპანია კულისებს მიღმა მუშაობდა Epic-ის მსგავსი აპლიკაციების მაღაზიების განვითარების შესაფერხებლად. გასულ წელს Epic-მა Samsung-ის წინააღმდეგ მსგავსი სარჩელი შეიტანა და კომპანია მესამე მხარის აპლიკაციების მაღაზიების დასაბლოკად ახალი ფუნქციის დანერგვაში დაადანაშაულა. საუბარია Samsung-ის ტელეფონებში Auto Blocker-ის დამატებაზე, რომელიც იცავს მოწყობილობას USB-ით განხორციელებული თავდასხმებისგან და, რაც მთავარია, ბლოკავს აპლიკაციების არაოფიციალური წყაროებიდან დაყენებას (sideloading). ამ ფუნქციის გარეშე კი Epic Games Store-ის ან მასში არსებული კონტენტის დაყენება შეუძლებელია.
Samsung-ის Auto Blocker-ის რეჟიმი მის ახალ სმარტფონებზე ნაგულისხმევად არის ჩართული.
Auto Blocker-ი Samsung-ის ტელეფონებზე ნაგულისხმევად არის ჩართული, თუმცა მომხმარებლებს შეუძლიათ მისი გათიშვა მოწყობილობის პირველადი გამართვისას. Epic-ი თავის სარჩელში ამტკიცებდა, რომ ამ ფუნქციის მოულოდნელი დანერგვა იმის ნიშანი იყო, რომ Google-ი და Samsung-ი კვლავ ერთად მუშაობდნენ ალტერნატიული აპლიკაციების მაღაზიების შესაფერხებლად. როგორც ჩანს, Epic-მა Samsung-ისგან სასურველი შედეგი მიიღო — კომპანიის დირექტორმა, ტიმ სუინიმ, განაცხადა, რომ ახალი მორიგების ფონზე Epic-ი სარჩელს უკან იტანს.
მოთხოვნების დაკმაყოფილება
ჯერჯერობით არავინ საუბრობს შეთანხმების დეტალებზე. სუინი მხოლოდ იმას აცხადებს, რომ Samsung-ი „Epic-ის მოთხოვნებს დააკმაყოფილებს“. თუმცა, გარკვეული ვარაუდების გამოთქმა შეგვიძლია, რადგან Epic-ის მოთხოვნები თავიდანვე ნათელი იყო. გასულ წელს სუინიმ განაცხადა, რომ სურდა, Samsung-ს შეეწყვიტა Auto Blocker-ის ნაგულისხმევად ჩართვა ან შეექმნა სანდო აპლიკაციების „თეთრი სია“, რომლებიც ინსტალაციის ბლოკირებას გვერდს აუვლიდნენ. სავარაუდოდ, მალე გავიგებთ, რომელი ვარიანტი არჩიეს. ამ კვირაში, 9 ივლისს, ოთხშაბათს, Samsung-მა Galaxy Z Fold 7 და Z Flip 7 წარადგინა. თუ ამ ტელეფონების გამართვისას მომხმარებლებს Auto Blocker-ი ავტომატურად ჩართული არ დახვდებათ, ეს კითხვას პასუხს გასცემს. ასევე შესაძლებელია, რომ Epic-სა და სხვა დამტკიცებულ მესამე მხარის მაღაზიებს Auto Blocker-ის რეჟიმში სპეციალური წვდომა მიენიჭოთ, რაც Samsung-ს უსაფრთხოების ზოგიერთი მექანიზმის შენარჩუნების საშუალებას მისცემს და ამავდროულად, Epic-ის მოთხოვნასაც დააკმაყოფილებს. უფრო საინტერესო შედეგი იქნებოდა, თუ Samsung-ი Epic Games Store-ის თავის ახალ ტელეფონებში წინასწარ დაყენებაზე დათანხმდებოდა. ეს ზუსტად ისეთი გარიგებაა, რომლის მიღწევასაც Epic-ი რამდენიმე წლის წინ ცდილობდა. სწორედ ასეთი პარტნიორობების კულისებში ჩაშლამ დააწერინა Google-ს წაგება ანტიმონოპოლიურ დავაში.
ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.
გაზიარება
როგორია თქვენი რეაქცია?
მოწონება
0
არ მომწონს
0
სიყვარული
1
სასაცილო
0
გაბრაზებული
0
მოწყენილი
0
ვაუ
0
