Ubuntu Intel-ის GPU-ზე უსაფრთხოების ზომებს თიშავს და 20%-იან წარმადობის ზრდას გვპირდება

Spectre-ის ტიპის შეტევებისგან თავდაცვამ დროთა განმავლობაში თავისი კვალი დაატყო წარმადობას. 

Ubuntu-ს მომხმარებლებმა, შესაძლოა, Intel-ზე დაფუძნებულ სისტემებზე გრაფიკული წარმადობის 20%-მდე ზრდა იხილონ ცვლილების შედეგად, რომელიც გათიშავს Spectre-ის სახელით ცნობილი თავდასხმების კლასის საწინააღმდეგო უსაფრთხოების შემარბილებელ ზომებს. 

შეგახსენებთ, Spectre-ის შესახებ საზოგადოებამ 2018 წელს შეიტყო. Spectre-ის ტიპის შეტევები ეფუძნება დაკვირვებას, რომ თანამედროვე პროცესორებში ჩაშენებული წარმადობის გამაძლიერებლები ქმნის გვერდით არხს, რომლითაც შესაძლებელია იმ საიდუმლოებების გაჟონვა, რომლებსაც პროცესორი ამუშავებს. წარმადობის ეს გამაძლიერებელი, ცნობილი როგორც „სპეკულაციური შესრულება“, პროგნოზირებს მომავალ ინსტრუქციებს, რომლებიც პროცესორმა შეიძლება მიიღოს და შემდეგ ასრულებს შესაბამის დავალებებს, სანამ ისინი რეალურად მოითხოვება. 

სპეციალურად შერჩეული კოდის გამოყენებით, რომელიც პროცესორს აიძულებს, შეასრულოს კონკრეტული ინსტრუქციები, Spectre-ის შეტევებს შეუძლია მოიპოვოს კონფიდენციალური მონაცემები. ბოლო შვიდი წლის განმავლობაში, მკვლევრებმა ამ არქიტექტურულ ხარვეზებზე დაფუძნებული თავდასხმის მრავალი ვარიანტი აღმოაჩინეს, რომელთა სრულად გამოსწორება შეუძლებელია. CPU-ს მწარმოებლებმა საპასუხოდ შექმნეს პატჩები როგორც მიკროკოდში, ისე ბინარულ კოდში, რომლებიც ზღუდავს სპეკულაციური შესრულების ოპერაციებს გარკვეულ სცენარებში. ეს შეზღუდვები კი, რა თქმა უნდა, ჩვეულებრივ ამცირებს პროცესორის წარმადობას. 

როდესაც ინვესტიცია უკუგებაზე მეტი ღირს 

დროთა განმავლობაში, ამ შემარბილებელმა ზომებმა გრაფიკული დამუშავების წარმადობა 20%-მდე შეამცირა, — განაცხადა ცოტა ხნის წინ Ubuntu-ს დეველოპერული გუნდის წევრმა. მისი თქმით, Ubuntu ბევრ იმავე შემარბილებელ ზომას პირდაპირ თავის ბირთვში (Kernel) ჩააინტეგრირებს, კონკრეტულად კი ოქტომბრისთვის დაგეგმილ Questing Quokka გამოშვებაში. Intel-ის კოლეგებთან კონსულტაციის შემდეგ, Ubuntu-ს უსაფრთხოების ინჟინრებმა გადაწყვიტეს, გათიშონ ეს ზომები Intel-ის გრაფიკული გამოთვლების Runtime-ის დრაივერში. 

„Intel-ისა და Canonical-ის (Ubuntu-ს დეველოპერი კომპანია) უსაფრთხოების გუნდებს შორის დისკუსიის შემდეგ, ჩვენ შევთანხმდით, რომ Spectre-ისგან დაცვა GPU-სთვის Compute Runtime-ის დონეზე საჭირო აღარ არის“, — წერს Ubuntu-ს დეველოპერი Shane McKee. 

მისი თქმით, „ამ ეტაპზე, Spectre-ისგან დაცვა ბირთვის დონეზეა უზრუნველყოფილი... ამ მიზეზების გამო, ვთვლით, რომ Spectre-ის შემარბილებელი ზომები Compute Runtime-ში აღარ გვთავაზობს საკმარის უსაფრთხოების ეფექტს, რომელიც გაამართლებს წარმადობის ამჟამინდელ დანაკარგს“. 

შედეგად, „მომხმარებლებს შეუძლიათ, 20%-მდე წარმადობის გაუმჯობესებას ელოდონ“. 

მკვლევრების უმეტესობა, რომლებსაც Ars-ი დაუკავშირდა, ამ გადაწყვეტილებას ეთანხმება. მათი აზრით, ბირთვში ჩაშენებული დაცვის ზომები, სავარაუდოდ, დაიცავს Spectre-ის თავდასხმის სცენარების უმეტესობისგან, თუ არა ყველასგან. მათ ასევე აღნიშნეს, რომ არ არსებობს ცნობილი შემთხვევა, როდესაც Spectre-ის შეტევები რეალურად აქტიურად იქნა გამოყენებული. 

„არავინ იწუხებს თავს ამ მოწყვლადობებზე თავდასხმით, რადგან მათ წინააღმდეგ ეფექტური შეტევების განხორციელება დიდ საინჟინრო დროს მოითხოვს და საინტერესო მონაცემების მოპოვება ძალიან ნაკლებად სავარაუდოა“, — წერს დამოუკიდებელი მკვლევარი Graham Sutherland-ი. „თავდამსხმელებისთვის ეს ეკონომიკურად უბრალოდ გაუმართლებელია.“ 

ერთი რამ, რაც Ubuntu-ს მომხმარებლებმა უნდა იცოდნენ, არის ის, რომ ცვლილება წარმადობის ზრდას მხოლოდ მაშინ უზრუნველყოფს, როდესაც GPU ამუშავებს სამუშაო დატვირთვებს, რომლებიც OpenCL ფრეიმვორქზე ან OneAPI Level Zero ინტერფეისზე მუშაობს. ეს, სავარაუდოდ, ნიშნავს, რომ ადამიანები, რომლებიც თამაშებსა და მსგავს აპლიკაციებს იყენებენ, სარგებელს ვერ იხილავენ. 

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ უფლება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.