ლოს-ანჯელესში ICE-ის რეიდების შემდეგ პროტესტანტებმა Waymo-ს რობოტაქსები დაწვეს

ფედერალური რეიდების წინააღმდეგ პროტესტის ფონზე, ზარალი Waymo-ს Jaguar I-Pace მოდელებს მიადგა. 

რობოტაქსების კომპანია Waymo-მ ლოს-ანჯელესის ზოგიერთ ნაწილში სერვისი შეაჩერა მას შემდეგ, რაც მისი რამდენიმე ავტომობილი აშშ-ის საიმიგრაციო და საბაჟო აღსრულების სამსახურის (ICE) მიერ ჩატარებული რეიდებით განრისხებულმა პროტესტანტებმა გამოიძახეს და დააზიანეს. Waymo-ს ხუთი ავტონომიური ელექტრომობილი Jaguar I-Pace ქალაქის ცენტრში, ანტი-ICE პროტესტების ადგილას აღმოჩნდა, სადაც მათ საბურავები დაუჭრეს, სპრეით წარწერები დაატანეს, სამი კი ცეცხლის ალში გაეხვა. 

ლოს-ანჯელესის პოლიციის დეპარტამენტმა (LAPD) მოსახლეობა გააფრთხილა, თავი აერიდებინათ ამ ტერიტორიისთვის მწველი ელექტრომობილებიდან გამოყოფილი ტოქსიკური აირების რისკის გამო. Waymo-მ კი Ars-ს განუცხადა, რომ ამ საკითხთან დაკავშირებით „კონტაქტზეა სამართალდამცავ უწყებებთან“. 

ლოს-ანჯელესში პროტესტანტები მას შემდეგ აღშფოთდნენ, რაც ICE-მა, სასტიკი ტაქტიკის გამოყენებით, ქალაქის მასშტაბით რეიდების დროს ადამიანების დაკავება დაიწყო. შაბათ-კვირას ათასობით ლოს-ანჯელესელი გამოვიდა ქუჩაში, რათა ნიღბიან ფედერალურ ძალოვნებს დაპირისპირებოდა და, ზოგიერთ შემთხვევაში, აიძულა ისინი, უკან დაეხიათ. 

საპასუხოდ, ტრამპის ადმინისტრაციამ 300-ზე მეტი ეროვნული გვარდიის ჯარისკაცის მობილიზება მოახდინა კალიფორნიის გუბერნატორთან კონსულტაციისა და მისი მოთხოვნის გარეშე. 

კალიფორნიის გუბერნატორი Gavin Newsom-ი ადმინისტრაციისთვის სარჩელის შეტანას დაჰპირდა. „Donald Trump-მა შექმნა ის პირობები, რომლებსაც დღეს თქვენს ტელეეკრანებზე ხედავთ. მან გაამწვავა ვითარება. მან, ასე ვთქვათ, ცეცხლზე ნავთი დაასხა, იმ მომენტიდან, როდესაც გამოაცხადა, რომ ეროვნულ გვარდიას თავის კონტროლქვეშ იღებდა — უკანონო, ამორალური და არაკონსტიტუციური ქმედებით“, — განაცხადა Newsom-მა ინტერვიუში. 

Waymo-მ ლოს-ანჯელესში მგზავრების გადაყვანა გასული წლის ნოემბერში დაიწყო და იანვრისთვის კომპანიამ განაცხადა, რომ ქალაქში თითქმის 2 მილიონი მილი გაიარა. მაგრამ რობოტაქსებისა და საკვების მიმტანი რობოტების მიმართ გარკვეული ანტიპათია არსებობს, რადგან მათ ახლა ლოს-ანჯელესის პოლიციის დეპარტამენტი სათვალთვალო კადრების წყაროდ იყენებს. აპრილში, LAPD-მ გამოაქვეყნა Waymo-დან მიღებული კადრები, რომლებიც საგზაო შემთხვევის ადგილიდან მიმალვის ფაქტის გამოსაძიებლად გამოიყენა. Waymo-მ Ars-ს განუცხადა, რომ ის სამართალდამცავ უწყებებს კადრებს მხოლოდ ორდერის წარდგენის შემთხვევაში აწვდის და მაშინაც, მხოლოდ იმ ინფორმაციას, რომელიც უშუალოდ ამ ორდერთანაა დაკავშირებული. 

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ უფლება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.