Apple Intelligence-ის ახალი ამბების შეჯამების ფუნქცია ბრუნდება — წითელი გამაფრთხილებელი ნიშნით

Apple-მა ეს ფუნქცია მიმდინარე წლის დასაწყისში, გახმაურებული შეცდომების შემდეგ, გათიშა.

Apple-მა ახლახან გამოუშვა iOS 26-ის, iPadOS 26-ისა და macOS 26-ის მეოთხე დეველოპერული ბეტა-ვერსიები. სხვა ცვლილებებთან ერთად, ახალ ვერსიებში ბრუნდება Apple Intelligence-ის მიერ ახალი ამბების აპლიკაციების შეტყობინებების შეჯამების ფუნქცია.

Apple-მა ეს ფუნქცია იანვარში, iOS 18.3-ის განახლების ფარგლებში, მას შემდეგ გათიშა, რაც სოციალურ ქსელებში არასწორი შეჯამებები გავრცელდა. საინფორმაციო ორგანიზაციებმა Apple-ს საჩივრით მიმართეს, განსაკუთრებით მას შემდეგ, რაც ერთ-ერთმა შეჯამებამ განაცხადა, რომ ლუიჯი მანჯიონემ, UnitedHealthcare-ის CEO-ს, ბრაიან თომპსონის, სავარაუდო მკვლელმა, თავი მოიკლა (რაც სიმართლეს არ შეესაბამებოდა).

ახალი განახლების დაყენების შემდეგ, Apple Intelligence-თან თავსებადი მოწყობილობების მომხმარებლებს სისტემა შესთავაზებს, ჩართონ ან გამორთონ შეტყობინებების შეჯამება სამი კატეგორიისთვის: „ახალი ამბებისა და გართობის“ აპლიკაციები, „კომუნიკაციისა და სოციალური“ აპლიკაციები და ყველა სხვა დანარჩენი.

Apple Intelligence-ის ყველა შეჯამება კვლავ „ბეტა“ სტატუსით არის წარმოდგენილი, მაგრამ Apple-ის მთავარი ცვლილება არის დიდი, წითელი დისკლეიმერი (გამაფრთხილებელი შეტყობინება), რომელიც ახალი ამბების შეჯამების ჩართვისას ჩნდება და მიუთითებს, რომ „შეჯამებამ, შესაძლოა, ორიგინალი სათაურების მნიშვნელობა შეცვალოს“. შეტყობინებებს ასევე ექნება სპეციალური წარწერა, „Summarized by Apple Intelligence“, რათა ისინი ჩვეულებრივი, შეუცვლელი შეტყობინებებისგან მარტივად გაირჩეს.

გავრცელებული ინფორმაციით, Apple Intelligence-მა ფონური გაუმჯობესებებიც განიცადა. Apple-ის ხელმძღვანელები საუბრობდნენ ფუნდამენტურ არქიტექტურულ ცვლილებებზე, რომლებიც, მაგალითად, Siri-ს ახალი ვერსიის გამოშვების საშუალებას მისცემდა და, სავარაუდოდ, შეტყობინებების შეჯამების ფუნქციაც ამით ისარგებლებს.

ნებისმიერ შემთხვევაში, დისკლეიმერი ცხადყოფს, რომ Apple-ის მიერ პრობლემის „გამოსწორება“ გულისხმობს მომხმარებლების გაფრთხილებას, რომ ისინი მზად უნდა იყვნენ არასწორი შეჯამებებისთვის და ჰქონდეთ ამ ფუნქციის გამორთვის საშუალება, ნაცვლად იმისა, რომ კომპანიამ შეჯამებების სისწორის გარანტია მოგვცეს.

სხვა ვიზუალური ცვლილებები, როგორიცაა შეჯამებების დახრილი შრიფტი (italic) და სპეციალური იკონკა, ახალ ვერსიებშიც შენარჩუნდება.

Apple-მა ივნისში განაცხადა, რომ ახალი ოპერაციული სისტემების პირველი საჯარო ბეტა-ვერსიები ივლისში გამოვიდოდა. ვინაიდან თვის ბოლომდე ცოტა დრო რჩება, დიდი ალბათობით, პირველი საჯარო ბეტა-ვერსია დღეს გამოსული დეველოპერული ვერსიის მსგავსი იქნება. საბოლოო ვერსიები კი ფართო საზოგადოებისთვის ამ შემოდგომაზე — ჩვეულებრივ, სექტემბერში ან ოქტომბერში — გახდება ხელმისაწვდომი.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.