Google-ი Instant Apps-ის ფუნქციას 2025 წლის დეკემბერში გააუქმებს

ოდესღაც აპლიკაციები მობილური პლატფორმის ღირებულების საზომი იყო, როდესაც Apple-ი და Google-ი ერთმანეთს ეჯიბრებოდნენ, თუ ვის ეყოლებოდა მეტი ერთეული თავიანთ მაღაზიებში. დღეს ციფრებს ასეთი მნიშვნელობა აღარ აქვს — აპლიკაციები საკმარისზე მეტია და Google-ის მცდელობა, ვების ნაწილი აპლიკაციებით ჩაანაცვლოს, წარსულს ბარდება. Instant Apps, ფუნქცია, რომლის დებიუტიც 2017 წელს შედგა, გავრცელებული ინფორმაციით, 2025 წლის დეკემბერში გაუქმდება. მის ნაცვლად, უბრალოდ, ინტერნეტის გამოყენება მოგიწევთ.

ეს სიახლე დეველოპერმა ლეონ ომელანმა Android Studio-ს უახლეს Canary ვერსიაში შენიშნა. დეველოპერული კლიენტი შეიცავს გაფრთხილებას, რომ Instant Apps-ი Google-ის სასაფლაოსკენ მიემართება. ეს ამ დროისთვის Google-ის ერთადერთი ოფიციალური დადასტურებაა.

Instant Apps-ი ცუდი იდეა არ იყო — ის უბრალოდ ზედმეტად გვიან გამოჩნდა. მობილური ეპოქის დასაწყისში, ბრაუზერები და ვებსაიტები სმარტფონებზე ნელი იყო, რაც აპლიკაციებს ბევრად უკეთეს ვარიანტად აქცევდა. თუმცა, მათი დაყენება ყველა საიტისთვის, რომელიც ამას გთავაზობდათ, მოუხერხებელი იყო. Google-ის Instant Apps-ი ცდილობდა, ეს გამოცდილება გაემარტივებინა და აპლიკაცია ინსტალაციის გარეშე, პირდაპირ მოეწოდებინა. როდესაც დეველოპერები ამ ფუნქციას ნერგავდნენ, მათ ვებსაიტზე ბმულზე დაკლიკებისას, ვებგვერდის ჩატვირთვის ნაცვლად, დაახლოებით იმავე დროში Android-ის აპლიკაცია იხსნებოდა.

მაგრამ ეს მაშინ იყო, ახლა კი სხვა დროა. დღეს, სულ უფრო მეტი მობილური აპლიკაცია ფუნქციურად იმ მობილური ვებსაიტების იდენტურია, რომელთა ჩანაცვლებასაც ისინი ისახავდნენ მიზნად, დეველოპერების მიერ Instant Apps-ის ათვისება კი მინიმალური იყო. შედეგად, უმეტეს ჩვენგანს, სავარაუდოდ, Instant Apps-ი მხოლოდ რამდენჯერმე თუ შეგვხვედრია.

ფუნქციის გამოსაყენებლად, რომელიც თითქმის ყველა Android მოწყობილობას Google Play Services-ის მეშვეობით მიეწოდებოდა, დეველოპერებს თავიანთი აპლიკაციის სპეციალური „მყისიერი“ ვერსია უნდა შეექმნათ, რომელიც 15MB-ზე ნაკლები ზომის იქნებოდა. ეს დამატებითი სამუშაო ყოველთვის დიდ დაბრკოლებას წარმოადგენდა, Google-ს კი, როგორც წესი, უჭირს დეველოპერების წახალისება, რომ ახალი ფუნქციები დანერგონ. დამატებით, მასში გენერაციული AI-ს „ჩატენვის“ საშუალებაც არ არის! ასე რომ, გასაკვირი არ არის, რომ Google-ი ამ ფუნქციას აუქმებს.

ეს ფუნქცია ამჟამად თქვენი სმარტფონის პარამეტრებში, Google-ის სერვისების კოლექციაში, „Google Play Instant“-ის სახელითაა მოცემული. სამწუხაროდ, ბევრი მაგალითი აღარ დარჩა, თუ გაინტერესებთ, როგორი იყო Instant Apps-ი — ფინური გამომცემლობა Ilta-Sanomat ერთ-ერთია იმ მცირერიცხოვანთაგან, რომელიც მას ჯერ კიდევ გთავაზობთ. თუ ნოსტალგიის მცირე დოზა გსურთ, დარწმუნდით, რომ Instant Apps-ის პარამეტრი ჩართული გაქვთ.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.