კომპანია, რომელიც უცნაურ, ცარიელ სარეკლამო ჭრებს არასამთავრობო ორგანიზაციების სასარგებლო გზავნილებად აქცევს

არასამთავრობო ორგანიზაციებს ხშირად არ შეუძლიათ სარეკლამო სივრცის შეძენა სტრიმინგ პლატფორმებზე.

დენვერი — სტრიმინგის დროს ნაჩვენები რეკლამები ისედაც საკმარისად გამაღიზიანებელია. მაგრამ განსაკუთრებით უცნაურია ის, რასაც ხედავთ, როდესაც დაკავშირებული ტელევიზიის (CTV) პლატფორმა სარეკლამო ინვენტარის გაყიდვას ვერ ახერხებს. შესაძლოა, შავ ეკრანს იდუმალი მუსიკის ან გაურკვეველი რიტმის ფონზე ხედავდეთ, წარწერით: „მალე დავბრუნდებით“.

მაყურებლებს არა მხოლოდ უწევთ იმაზე მეტი სარეკლამო დროის ატანა, ვიდრე ოდესმე, არამედ ეს დრო ყოველთვის არც სტრიმინგ პლატფორმებს ან რეკლამის განმთავსებლებს მოაქვს სარგებელს. ბოლო ექვსი თვის განმავლობაში, AdGood-ი მუშაობს იმაზე, რომ ეს ცარიელი, გამოუყენებელი სარეკლამო სივრცე სასიკეთო გზავნილებად აქციოს და არასამთავრობო ორგანიზაციებს სარეკლამო დროის იაფად შეძენაში დაეხმაროს.

ამ კვირას დენვერში გამართულ StreamTV Show-ზე, Ars-ი ესაუბრა Kris Johns-ს, AdGood-ის დამფუძნებელსა და აღმასრულებელ დირექტორს. AdGood-ი არის 501(c)(3) სტატუსის მქონე არაკომერციული ორგანიზაცია, რომელიც გამოუყენებელ CTV სარეკლამო სივრცეს სხვა არასამთავრობო ორგანიზაციებზე ყიდის. AdGood-ი გაუყიდავ, ზოგჯერ შემოწირულ სარეკლამო სივრცეს ფასდაკლებით ყიდის, რაც, მისი თქმით, შეიძლება $5-$6 CPM-მდე (ღირებულება ათას ჩვენებაზე) დაეცეს. Johns-მა აღნიშნა, რომ CTV CPM-ები სცენარის მიხედვით იცვლება და $12-$15-დან იწყება, ზოგიერთი CTV სარეკლამო ფირმა კი საშუალო CPM-ს $35-$65-ად აფასებს.

Johns-ის თქმით, AdGood-ს ამჟამად 60-ზე მეტი არასამთავრობო კლიენტი ჰყავს აშშ-ში, რომლებიც სხვადასხვა ზომისა და სფეროს ორგანიზაციებს წარმოადგენენ, მათ შორის ცხოველთა დაცვის, განათლების, ჯანდაცვისა და უსახლკარობის საკითხებზე მომუშავეებს.

AdGood-ი არასამთავრობო ორგანიზაციებისთვის CTV სარეკლამო სივრცის იაფად მიყიდვას პარტნიორობის საშუალებით ახერხებს, მათ შორის LG Ad Solutions-თან და, როგორც ამ კვირას გამოცხადდა, Stingray-სა და Plex-თან.

„AdGood-თან პარტნიორობა საშუალებას გვაძლევს, ჩვენი მედია პლატფორმის გავლენა გავავრცელოთ იმ არასამთავრობო ორგანიზაციებზე, რომლებიც მთელ მსოფლიოში კრიტიკულად მნიშვნელოვან საქმეს აკეთებენ“, — განაცხადა Shawn Eldridge-მა, Plex-ის ბიზნესის განვითრებისა და კონტენტის ვიცე-პრეზიდენტმა.

დახმარება არასამთავრობოებისთვის რეკლამების შექმნაში

AdGood-ი ასევე ყიდის თვითმომსახურების გენერაციულ AI სარეკლამო მენეჯერს, რომელსაც Streamr.AI-სთან პარტნიორობით სთავაზობს. ინსტრუმენტი შექმნილია 30-წამიანი ვიდეო რგოლების შექმნის პროცესის გასამარტივებლად, რომლებიც „სრულად რედაქტირებადია ჩატის ბრძანების საშუალებით“, — ამბობს Johns-ი.

აღმასრულებელი დირექტორის თქმით, AdGood-ი არასამთავრობო ორგანიზაციებს ამ სერვისისთვის $7 CPM-სა და $250-ის ფიქსირებულ გადასახადს ახდევინებს. მან დაამატა:

„წარმოიდგინეთ პატარა არასამთავრობო ორგანიზაცია ადგილობრივ თემში, მაგალითად, ჩემი შვილის სპეციალური საჭიროებების მქონე ბავშვთა ბეისბოლის გუნდი. მე შემიძლია ხუთ სხვა მშობელთან ერთად ადვილად შევქმნა კამპანია და გავუშვა ის ჩვენს ქალაქში. თუ შვიდ ბავშვს მოვიზიდავთ, ეს მათ ცხოვრებას შეცვლის. ჩვენ ვსაუბრობთ იმაზე, რომ $250-ს შეუძლია უდიდესი გავლენა მოახდინოს ადგილობრივ ბაზარზე“.

Johns-მა თქვა, რომ სურს, AdGood-ის პლატფორმა და გუნდი გაიზარდოს, რათა ყველა კლიენტს შეეძლოს „ინვენტარის გარკვეული ნაწილის მიღება, იქნება ეს 50,000 თუ 100,000 ჩვენება თვეში“.

ზოგისთვის სტრიმინგის რეკლამები იშვიათად არის კარგი. მაგრამ როდესაც ამ რეკლამებს შეუძლია დაეხმაროს მნიშვნელოვან საქმეებს და ჩაანაცვლოს უცნაური, ცარიელი სარეკლამო სივრცეები, რომლებიც ჩვენს არსებობაზე გვაფიქრებინებს, ეს „კარგი“ რეკლამის იდეას ახალ მნიშვნელობას სძენს.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსიები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.