Google-ის ძიების ხელმძღვანელი ამბობს, რომ AI საძიებო კლიკებს არ „კლავს“

ლიზ რეიდის თქმით, Google-ის მონაცემები აჩვენებს, რომ AI სტაბილურ კლიკებსა და უკეთეს გამოცდილებას ქმნის.

Google-ი ხშირად ღიზიანდება იმის მტკიცებაზე, რომ მისი გატაცება AI-ძიებით ვებ-ტრაფიკს აზიანებს. ახლა კი, ძიების ხელმძღვანელმა, ლიზ რეიდმა, ამ თემაზე ბლოგპოსტი გამოაქვეყნა. რეიდის თქმით, კლიკები არ მცირდება, AI უფრო მეტ ძიებას იწვევს და ინტერნეტში ყველაფერი რიგზეა. თუმცა, ოპტიმისტური ტონის მიუხედავად, პოსტი არანაირ რეალურ მონაცემებს არ გვაწვდის ამ მტკიცებულებების გასამყარებლად.

ეს განცხადება, როგორც ჩანს, პირდაპირი პასუხია Pew Research Center-ის ბოლოდროინდელ ანალიზზე, რომელმაც აჩვენა, რომ ძიებებს, რომლებსაც AI-მიმოხილვები (AI Overviews) ახლდა, დაბალი კლიკების კოეფიციენტი ჰქონდა. Google-მა ამ კვლევის დასკვნები და მეთოდოლოგია გააპროტესტა.

ამ პოსტის მთავარი მტკიცებულება ისაა, რომ Google-ი ვებსაიტებზე ნაკლებ კლიკებს არ აგზავნის. რეიდის თქმით, „ორგანული კლიკების საერთო მოცულობა წლიდან წლამდე შედარებით სტაბილური“ დარჩა. ამავდროულად, Google-ი თავის მხრივ, უფრო მეტ ძიებას ხედავს, რაც კომპანიისთვის ყველაზე მნიშვნელოვანი მეტრიკაა.

Google-ის ძიების ხელმძღვანელი, ლიზ რეიდი, ამბობს, რომ AI ვებს არ აზიანებს. 

Google-ის ნათქვამის აზრი ნაწილობრივ ნათელი ხდება, როდესაც რეიდი ზოგიერთ ფართო ტენდენციას განიხილავს, რომელიც კომპანიამ შენიშნა. ის ამბობს, რომ ძიების მომხმარებლები სულ უფრო მეტად ეძებენ „ავთენტურ ხმებსა და პირად პერსპექტივებს“, რაც „Reddit“-ის კოდურ სიტყვას ჰგავს. Google-მა 2024 წლის დასაწყისში Reddit-თან პარტნიორობა დაიწყო, რითაც წვდომა მიიღო მის უამრავ ავთენტურ ხმაზე AI-ს გასაწვრთნელად და ამის შემდეგ, შეუძლებელია, არ შეამჩნიო, თუ როგორ გაზარდა Google-მა Reddit-ის ბმულების ჩვენება საძიებო შედეგებში.

Reddit-ის ტრაფიკი 2021 წლის შემდეგ გაორმაგდა და ზრდა მნიშვნელოვნად დაჩქარდა ბოლო 18 თვის განმავლობაში. Reddit-ის თანახმად, რომელიც ინტერნეტში ერთ-ერთი უდიდესი საიტია, მან ყოველდღიური აქტიური მომხმარებლების 21%-იანი ზრდა დააფიქსირა მხოლოდ გასულ წელს.

ასე რომ, შეიძლება მართალი იყოს, რომ Google-ი ჯამურად ვებსაიტებზე დაახლოებით იგივე რაოდენობის კლიკებს აგზავნის, მაგრამ ამ კლიკებიდან მეტი, შესაძლოა, მიდიოდეს იმ საიტებზე, რომლებსაც ის როგორც ორგანულ შედეგებში, ისე AI-პასუხებში ანიჭებს უპირატესობას.

რეიდი პოსტს საეჭვო მტკიცებულებით ასრულებს, რომ Google-ი, შესაძლოა, მსოფლიოში ნებისმიერ სხვა კომპანიაზე მეტად ზრუნავდეს „ვებ-ეკოსისტემის ჯანმრთელობაზე“. მისი თქმით, ახალი პროდუქტები, როგორიცაა AI-მიმოხილვები, შექმნილია ვების ხაზგასასმელად და არა კლიკის საჭიროების ჩასანაცვლებლად. მაგრამ, ამავდროულად, პოსტი აღიარებს, რომ ზოგჯერ ადამიანები იღებენ იმას, რაც სჭირდებათ AI-პასუხიდან და „შემდგომ აღარ აკლიკებენ“. შეიძლება, ორივე მართალი იყოს?

სანამ Google-ი თავისი მტკიცებულებების გასამყარებლად მეტრიკებს არ წარმოადგენს, შეუძლებელია, ზუსტად ითქვას, რა ხდება.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.