სენატის რესპუბლიკური კანონპროექტის შედეგად, თითქმის 12 მილიონი ადამიანი ჯანმრთელობის დაზღვევას დაკარგავს — CBO

კონგრესის საბიუჯეტო ოფისის ანგარიში ამერიკის ჯანდაცვისთვის მძიმე სურათს ხატავს.

პრეზიდენტ ტრამპის საგადასახადო კანონპროექტის სენატის რესპუბლიკური ვერსია 2034 წლისთვის ჯანდაცვის დებულებებზე — Medicare, Medicaid და Affordable Care Act — ფედერალურ დანახარჯებს 1.1 ტრილიონი დოლარით შეამცირებს. ამ დროის განმავლობაში კი, სავარაუდოდ, 11.8 მილიონი ადამიანი ჯანმრთელობის დაზღვევას დაკარგავს.

ეს მონაცემები კონგრესის საბიუჯეტო ოფისის (CBO) მიერ შაბათ-კვირას გამოქვეყნებულ ანალიზს ეფუძნება. მასშტაბური კანონმდებლობა, სავარაუდოდ, შეიცვლება, რადგან სენატორები ამჟამად „კენჭისყრის მარათონის“ რეჟიმში მუშაობენ შესწორებების წინადადებებზე.

ჯანდაცვის დანახარჯების სავარაუდო შემცირების უდიდესი ნაწილი Medicaid-ზე მოდის, რომელიც 1 ტრილიონ დოლარზე მეტს დაკარგავს. იმ 11.8 მილიონი ადამიანიდან, რომლებმაც, შესაძლოა, ჯანმრთელობის დაზღვევა დაკარგონ, 1.4 მილიონი „დაუდასტურებელი მოქალაქეობის“ ან „არასათანადო საიმიგრაციო სტატუსის“ მქონე პირია, აღნიშნავს CBO.

როგორ მუშაობს შემცირებები?

Medicaid-ის — პროგრამის, რომელიც ერთობლივად ფინანსდება შტატებისა და ფედერალური მთავრობის მიერ — არსებითი შემცირება, ძირითადად, კანონპროექტის ორ მახასიათებელს უკავშირდება, აღნიშნავს The New York Times.

1. სამუშაოს მკაცრი მოთხოვნა: მიუხედავად იმისა, რომ Medicaid-ზე მყოფი შრომისუნარიანი ასაკის ზრდასრულთა უმრავლესობა უკვე მუშაობს, ახალი მოთხოვნები, სავარაუდოდ, Medicaid-ის დანახარჯებს ათწლეულის განმავლობაში 325 მილიარდი დოლარით შეამცირებს. 2023 წლის CBO-ს ანალიზმა კი აჩვენა, რომ სამუშაოს მკაცრი მოთხოვნა დასაქმებას არ გაზრდიდა.

2. პროვაიდერების გადასახადების შეზღუდვა: ეს არის მანევრი, რომლის დროსაც შტატები სამედიცინო პროვაიდერებზე გადასახადებს აწესებენ, შემდეგ კი ამ თანხებს მათთვის Medicaid-ის გადახდების გასაზრდელად იყენებენ. ეს, თავის მხრივ, შტატს საშუალებას აძლევს, ფედერალური მთავრობისგან მეტი თანადაფინანსება მიიღოს. სენატის კანონპროექტი ბევრ შტატს აიძულებს, შეამციროს ამჟამინდელი საგადასახადო განაკვეთები, რაც ფედერალური დანახარჯების დაახლოებით 375 მილიარდი დოლარით შემცირებას შეუწყობს ხელს.

პოლიტიკური რეაქცია

კანონმდებლობას მოწინააღმდეგეები რესპუბლიკელთა რიგებშიც ჰყავს და ის ასევე ძალიან არაპოპულარულია ამერიკელებში. სენატორმა ტომ ტილისმა (რესპუბლიკელი, ჩრდილოეთ კაროლინა), რომელმაc ამ შაბათ-კვირას განაცხადა, რომ ხელახლა კენჭს აღარ იყრის, კანონპროექტი სასტიკად გააკრიტიკა.

„რა ვუთხრა 663,000 ადამიანს ორ-სამ წელიწადში, როდესაც პრეზიდენტი ტრამპი თავის პირობას დაარღვევს და მათ Medicaid-იდან გარიცხავს, რადგან დაფინანსება აღარ იქნება?“ — იკითხა მან კვირა ღამით სენატის სხდომაზე.

Kaiser Family Foundation-ის მიერ ამ თვის დასაწყისში ჩატარებულმა გამოკითხვამ აჩვენა, რომ ამერიკელების 64% კანონპროექტის წარმომადგენელთა პალატის ვერსიას ეწინააღმდეგებოდა. მაგრამ კანონპროექტის მიმართ უარყოფითი დამოკიდებულება 74%-მდე გაიზარდა, როდესაც ადამიანებს ჰკითხეს: „რა მოხდება, თუ გაიგებთ, რომ დამტკიცების შემთხვევაში, ეს კანონპროექტი ჯანმრთელობის დაზღვევის გარეშე დარჩენილ ადამიანთა რიცხვს დაახლოებით 10 მილიონით გაზრდის?“

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.