ხანგრძლივი სარეკლამო ჭრები რეკლამაზე დაფუძნებული სტრიმინგ-გამოწერების ღირებულებას ამცირებს

ბოლო დროს გახანგრძლივებულ სარეკლამო ჭრებს მხოლოდ Amazon Prime Video-ს გამომწერები არ უჩივიან. Warner Bros. Discovery-ს (WBD) სტრიმინგ-სერვისმა Max-მაც გაზარდა რეკლამების რაოდენობა, რომელსაც ამერიკელ გამომწერებს უჩვენებს — საათში დაახლოებით ოთხი წუთიდან ექვს წუთამდე.

Max-ის აშშ-ის მხარდაჭერის გვერდზე ამჟამად ნათქვამია, რომ რეკლამიანი პაკეტის გამომწერებმა „საათში დაახლოებით 6 წუთი რეკლამა უნდა იხილონ“. თუმცა, PCWorld-მა ამ კვირაში შენიშნა, რომ ეს ინფორმაცია განსხვავდება იმისგან, რასაც Max-ი ადრე აცხადებდა. Internet Archive-ის Wayback Machine-ის მიხედვით, სულ რაღაც თებერვალში ეს მაჩვენებელი „დაახლოებით 4 წუთი“ იყო.

აშშ-ის გამომწერებისთვის რეკლამების ხანგრძლივობის 50%-ით ზრდა Max-ის სარეკლამო დატვირთვას Amazon Prime Video-სას უტოლებს, რომელმაც, AdWeek-ის თანახმად, გასულ კვირას ასევე გაზარდა რეკლამის ხანგრძლივობა საათში ოთხი წუთიდან ექვს წუთამდე. შედარებისთვის, Netflix-ი საათში ოთხიდან ხუთ წუთამდე რეკლამას უჩვენებს, Peacock-ი — ხუთიდან შვიდ წუთამდე.

დარღვეული პირობა

რეკლამაზე დაფუძნებული Max-ის გამოწერის დებიუტისას, WBD პირობას დებდა, რომ „Max-ი ინდუსტრიაში ერთ-ერთ ყველაზე მსუბუქ სარეკლამო დატვირთვას შეინარჩუნებდა“. 2021 წელს, როდესაც კომპანიამ HBO Max-ზე რეკლამები დაამატა, ის აცხადებდა, რომ „რეკლამები HBO-ს პროგრამების დროს არ გავიდოდა“.

მაგრამ ეს ძველი პირობა Max-ზე აღარ გავრცელდა. როგორც PCWorld-მა აღნიშნა, Max-ი რეკლამებს HBO-ს ორიგინალური კონტენტის, მაგალითად, The Last of Us-ის, ჩვენების დროსაც რთავს. გამოცემის თანახმად, სერიალის მსვლელობისას მათ სამი სარეკლამო ჭრა იხილეს, გარდა იმ რეკლამებისა, რომლებიც შოუს დაწყებამდე გავიდა.

Ars Technica-მ კომენტარისთვის WBD-ს მიმართა, მაგრამ პუბლიკაციამდე პასუხი არ მიუღია.

ღირებულების შემცირება

ბოლო რამდენიმე წლის განმავლობაში მრავალი სტრიმინგ-სერვისის გაშვების გამო, მომხმარებლებს უწევთ, რამდენიმე პლატფორმა გამოიწერონ, რათა ყველა სასურველ ფილმსა და სერიალზე ჰქონდეთ წვდომა. პროვაიდერები ასევე რეგულარულად ზრდიან სააბონენტო გადასახადებს და პაროლების გაზიარებაზე შეზღუდვებს აწესებენ. რეკლამაზე დაფუძნებული გამოწერები კი სტრიმინგის უფრო იაფ ალტერნატივად უნდა ქცეულიყო.

სარეკლამო დროის გაზრდით, პროვაიდერები ამ იაფი პაკეტების ღირებულებას ამცირებენ. მაგალითად, ონლაინ სივრცეში ადამიანები კითხვის ნიშნის ქვეშ აყენებენ Max-ის რეკლამიანი გამოწერის ღირებულებას, რომელიც თვეში $10 ღირს, ურეკლამო Max-ის $17-იან პაკეტთან შედარებით.

„არ ვიცი, ამაზე უარესი როგორ შეიძლება იყოს. რამდენიმე HBO-ს დოკუმენტურ ფილმს ვუყურე და მათ უკვე უფრო მეტი რეკლამა ჰქონდათ, ვიდრე Pluto TV-ს [უფასო, რეკლამაზე დაფუძნებულ სერვისს],“ — დაწერა Reddit-ის ერთ-ერთმა მომხმარებელმა.

სხვა Reddit-ის მომხმარებელმა კი განაცხადა, რომ „თუ [Max]-ს რეკლამები აქვს, ის თვეში $10 არ უნდა ღირდეს“.

ასეთი ხანგრძლივი სარეკლამო ჭრები უკვე სცდება მოსახერხებელ, წასახემსებლად ან საპირფარეშოში გასასვლელად განკუთვნილ პაუზას და გამომწერებს აიძულებს, დაფიქრდნენ საკუთარი დროის ღირებულებაზე.

თუმცა, იმის გათვალისწინებით, რომ ტრადიციული ტელევიზია საათში 13-დან 16 წუთამდე რეკლამას უჩვენებს, სტრიმინგ-პროვაიდერებს ჯერ კიდევ აქვთ სივრცე, კიდევ უფრო მეტი რეკლამა დაამატონ და თან განაცხადონ, რომ ალტერნატივებზე ნაკლებ რეკლამას უჩვენებენ.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.