Apple-ის ახალი გეგმა „AppleCare One“ სამი გაფართოებული გარანტიის პაკეტს თვეში $20-ად აერთიანებს

თქვენ შეგიძლიათ, ახალ გეგმაში ძველი მოწყობილობებიც დაამატოთ, მაშინაც კი, თუ მათ გარანტია უკვე აღარ აქვთ.

Apple-მა გუშინ თავისი გაფართოებული გარანტიის პროგრამა AppleCare-ში საკმაოდ მნიშვნელოვანი განახლება წარადგინა: AppleCare One. ეს არის პროგრამა, რომელიც განკუთვნილია იმ მომხმარებლებისთვის, რომლებსაც რამდენიმე Apple მოწყობილობა აქვთ და ყველასთვის სურთ გაფართოებული აპარატურული და პროგრამული მხარდაჭერა.

პროგრამას შეუძლია, დაფაროს სამამდე მოწყობილობა, მიუხედავად მათი ტიპისა, თვეში $19.99-ად. დამატებითი მოწყობილობების ჩართვა კი თვეში $5.99 დაჯდება.

ახალი პროგრამა მას შემდეგ დაანონსდა, რაც რამდენიმე თვის წინ Apple-მა აშშ-ში iPhone-ის AppleCare+ გამოწერის ფასები გაზარდა.

დაგიზოგავთ თუ არა ფულს AppleCare One-ი?

დაგიზოგავთ თუ არა ფულს AppleCare One-ი, დამოკიდებულია იმაზე, თუ რა ტიპის მოწყობილობებს ფარავთ. ზოგადად, ნებისმიერ გეგმაში, რომელიც iPhone-ს მოიცავს, მინიმუმ ხარჯებს დაფარავთ, მაგრამ მეტს დაზოგავთ, თუ მაღალი კლასის მოწყობილობებს — როგორიცაა iPhone Pro და iPad Pro — აზღვევთ.

• მაგალითი 1 (მცირე დანაზოგი): თუ თქვენ ფარავთ iPhone 16e-ს ($9.99/თვეში), მე-11 თაობის iPad-ს ($3.49/თვეში) და 13-დუიმიან MacBook Air-ს ($6.99/თვეში), AppleCare One-ით მხოლოდ 48 ცენტს დაზოგავთ.

• მაგალითი 2 (დიდი დანაზოგი): მაგრამ თუ დააზღვევთ iPhone 16 Pro Max-ს ($13.99/თვეში), 13-დუიმიან M4 iPad Pro-ს ($8.49/თვეში) და 16-დუიმიან MacBook Pro-ს ($14.99/თვეში), თვეში შთამბეჭდავ $17.48-ს დაზოგავთ.

გამოწერამდე აუცილებლად დაიანგარიშეთ, განსაკუთრებით, თუ თქვენს მიერ დასაზღვევი მოწყობილობებიდან ერთ-ერთი ან ორი ისეთი პროდუქტია, როგორიცაა დესკტოპ Mac-ი ან Apple Watch-ი.

AppleCare One-ში ასევე შეგიძლიათ, ჩართოთ თქვენი სხვა Apple პროდუქტები, რომლებიც „ოთხ წლამდე ასაკისაა“ (ყურსასმენებისთვის — ერთი წელი) და „კარგ მდგომარეობაშია“, მაშინაც კი, თუ AppleCare+-ზე გამოსაწერად დაშვებული 60-დღიანი საშეღავათო პერიოდი გასულია. Apple-ი აცხადებს, რომ ამ მოწყობილობების მდგომარეობის გადამოწმება, შესაძლოა, „მომხმარებლის iPhone-ის ან iPad-ის მეშვეობით, ან Apple Store-ში“ გახდეს საჭირო, სავარაუდოდ, იმ ადამიანების რიცხვის შესამცირებლად, ვინც უკვე დაზიანებული მოწყობილობების ძვირადღირებული რემონტის თავიდან ასაცილებლად იწერს პროგრამას.

ახალი უპირატესობები

პოტენციური დანაზოგის გარდა, ახალი გეგმა რამდენიმე ახალ უპირატესობასაც ამატებს ზოგიერთი მოწყობილობისთვის. მაგალითად, AppleCare One-ი ფარავს iPad-ებისა და Apple Watch-ების ქურდობას, რაც სტანდარტულ AppleCare+ გამოწერაში ამ მოწყობილობებისთვის არ შედიოდა. გამოწერა ასევე ამარტივებს „trade-in“ პროცესს: ჩაბარებული მოწყობილობა ავტომატურად იშლება თქვენი გეგმიდან და მას განახლებული მოწყობილობა ანაცვლებს.

შეგახსენებთ, AppleCare+ ფუნქციონირებს როგორც გაფართოებული გარანტია, ისე სადაზღვევო პროგრამა. თუ თქვენი მოწყობილობა თქვენგან დამოუკიდებელი მიზეზების გამო გაფუჭდება, რემონტი და შეცვლა, როგორც წესი, უფასოა. შემთხვევითი დაზიანების, ქურდობის, დაკარგვის ან ბატარეის შეცვლისთვის კი მომხმარებლები იხდიან დამატებით, ფიქსირებულ მომსახურების საფასურს. ბატარეის შეცვლა ასევე უფასოა, როდესაც მისი მოცულობა თავდაპირველი ტევადობის 80%-ზე ქვემოთ ჩამოდის.

AppleCare One-ის გეგმები გაყიდვაში გუშინ, 24 ივლისს, გამოვიდა.

ITNEWS-ის მეგობარი ვებ-გვერდია ITJOBS.GE. ITJOBS.GE-ზე ორგანიზაციებს და ფიზიკურ პირებს, აქვთ საშუალება განათავსონ როგორც ვაკანსები, ტრენინგები და ივენთები ასევე კონკრეტული Tech დავალებები, რისთვისაც ეძებენ დეველოპერებს, დიზაინერებს, სეო სპეციალისტებს და ა.შ. ITJOBS.GE - იპოვე დასაქმების საუკეთესო შესაძლებლობები ან გამოაქვეყნე ვაკანსია / დავალება და მიაწვდინე ხმა სასურველ აუდიტორიას.